रिमझिम सरींनी धानपिकाला दिला जीवदान; दिना प्रकल्पातील पाणीसाठ्यातही समाधानकारक वाढ

जिल्हा प्रतिनिधी |नितेश गट्टीवार

गडचिरोली/चामोर्शी, दि. २१ जुलै :गेल्या दहा ते बारा दिवसांपासून पावसाने दडी मारल्याने चामोर्शी तालुक्यासह परिसरातील खरीप हंगामावर संकटाचे सावट निर्माण झाले होते. धान रोवणीची कामे ठप्प झाली होती, तर अनेक शेतांमधील पेरणी केलेली पिके ओलाव्याअभावी कोमेजण्याच्या मार्गावर होती. मात्र गेल्या काही दिवसांपासून सुरू झालेल्या रिमझिम सरींनी बळीराजाला मोठा दिलासा दिला असून धानपिकाला नवसंजीवनी मिळाली आहे. त्याचबरोबर दिना (क. क.) प्रकल्पातील पाणीसाठ्यातही लक्षणीय वाढ झाल्याने शेतकरी आणि नागरिकांमध्ये आशेचे वातावरण निर्माण झाले आहे.

यंदा मान्सूनच्या प्रारंभी समाधानकारक पाऊस झाल्याने शेतकऱ्यांनी मोठ्या उत्साहात पेरणीची कामे सुरू केली होती. मात्र त्यानंतर पावसाने अचानक विश्रांती घेतल्याने शेतातील ओलावा कमी झाला. धानपिकाच्या वाढीवर त्याचा विपरीत परिणाम होऊ लागल्याने शेतकरी चिंतेत होते. अनेक ठिकाणी पिके पिवळी पडू लागली होती, तर रोवणीसाठी तयार असलेली शेतेही कोरडी पडली होती.

अशा परिस्थितीत सुरू झालेल्या हलक्या ते मध्यम स्वरूपाच्या पावसाने संपूर्ण चित्र बदलले आहे. शेतांमध्ये पुन्हा ओलावा निर्माण झाल्याने धानपिकाच्या वाढीस पोषक वातावरण तयार झाले आहे. रोवणीची रखडलेली कामे पुन्हा वेगाने सुरू झाली असून, पाऊस कायम राहिल्यास खरीप हंगाम चांगला होईल, असा विश्वास शेतकरी व्यक्त करीत आहेत.

दरम्यान, तालुक्यातील विविध भागांत झालेल्या पावसामुळे दिना (क. क.) जलाशयातील पाणीसाठ्यातही समाधानकारक वाढ झाली आहे. १९ जुलै २०२६ रोजी सायंकाळी ५ वाजेपर्यंतच्या नोंदीनुसार, प्रकल्पाची जलपातळी २२८.२१ मीटर इतकी असून ३६.३४ दलघमी म्हणजेच ५३.८० टक्के उपयुक्त पाणीसाठा उपलब्ध झाला आहे. प्रकल्पाची एकूण संकल्पित पाणीसाठा क्षमता ७२.७५ दलघमी, तर उपयुक्त संकल्पित क्षमता ६७.५४ दलघमी असून पूर्ण जलाशय पातळी २३०.५७ मीटर आहे.

विशेष म्हणजे, गतवर्षी याच दिवशी दिना प्रकल्पात २८.६१ दलघमी (४२.८६ टक्के) उपयुक्त पाणीसाठा होता. त्याच्या तुलनेत यंदा ३६.३४ दलघमी (५३.८० टक्के) पाणीसाठा उपलब्ध असल्याने जलसाठ्यात लक्षणीय वाढ झाली आहे. त्यामुळे खरीप हंगामासाठी सिंचनाची उपलब्धता, तसेच भविष्यातील पिण्याच्या पाण्याचा प्रश्नही मोठ्या प्रमाणात सुकर होण्याची चिन्हे आहेत.

हवामान विभागाच्या अंदाजानुसार पुढील काही दिवस पावसाचा जोर कायम राहिल्यास दिना प्रकल्पातील पाणीसाठ्यात आणखी वाढ होण्याची शक्यता आहे. त्यामुळे सिंचन व्यवस्था अधिक सक्षम होण्यास मदत होणार असून शेतकऱ्यांच्या आशा अधिक बळकट झाल्या आहेत.

एकूणच, काही दिवसांपूर्वी दुष्काळसदृश परिस्थितीची चिंता व्यक्त करणाऱ्या बळीराजाच्या चेहऱ्यावर आता पुन्हा समाधानाचे हास्य उमटले आहे. रिमझिम सरींनी धानपिकाला जीवदान दिले असून, दिना प्रकल्पातील वाढता पाणीसाठा खरीप हंगामासाठी शुभसंकेत ठरत आहे.