शिक्षक हे समाज घडविणारे खरे शिल्पकार” – नगराध्यक्षा प्रणोती सागर निंबोरकर

सेवानिवृत्त शिक्षकांचा सन्मान; शिक्षक दिन उत्साहात साजरा

जिल्हा प्रतिनिधी|नितेश गट्टीवार

गडचिरोली : महाराष्ट्र राज्य सेवानिवृत्त शिक्षक, शिक्षकेतर कर्मचारी व अधिकारी संघटना, जिल्हा शाखा गडचिरोली यांच्या वतीने शिक्षक दिन उत्साहपूर्ण आणि भावनिक वातावरणात साजरा करण्यात आला. शिक्षण क्षेत्रात आयुष्यभर निष्ठेने आणि उल्लेखनीय योगदान देणाऱ्या सेवानिवृत्त शिक्षक, शिक्षकेतर कर्मचारी व अधिकाऱ्यांचा यावेळी मान्यवरांच्या हस्ते गौरव करून त्यांच्या कार्याला कृतज्ञतापूर्वक सलाम करण्यात आला.

कार्यक्रमाला नगराध्यक्षा प्रणोती सागर निंबोरकर यांची प्रमुख उपस्थिती होती. त्यांच्या हस्ते सेवानिवृत्त शिक्षक, शिक्षकेतर कर्मचारी व अधिकाऱ्यांचा सन्मान करण्यात आला. यावेळी उपस्थित मान्यवरांनी आपल्या मार्गदर्शनातून शिक्षकांच्या योगदानाचे महत्त्व अधोरेखित करत त्यांच्या प्रदीर्घ सेवेला अभिवादन केले.

यावेळी मार्गदर्शन करताना नगराध्यक्षा प्रणोती सागर निंबोरकर म्हणाल्या, “शिक्षक हे समाज घडविणारे खरे शिल्पकार आहेत.” शिक्षक विद्यार्थ्यांना केवळ पुस्तकी ज्ञान देत नाहीत, तर त्यांच्या व्यक्तिमत्त्वाची जडणघडण करताना संस्कार, शिस्त, मूल्ये आणि जीवनाकडे पाहण्याची सकारात्मक दृष्टी देण्याचे महत्त्वपूर्ण कार्य करतात.

शिक्षकांच्या योगदानामुळेच समाजाला सक्षम, सुजाण आणि जबाबदार नागरिक मिळतात. त्यामुळे सेवानिवृत्तीनंतरही शिक्षकांचा प्रदीर्घ अनुभव, ज्ञान आणि मार्गदर्शन समाजासाठी अत्यंत मौल्यवान आहे. त्यांच्या कार्याचा सन्मान करणे ही समाजाची जबाबदारी असल्याचेही निंबोरकर यांनी नमूद केले.

“शिक्षकांनी आपल्या आयुष्याची अनेक वर्षे भावी पिढी घडविण्यासाठी समर्पित केली आहेत. त्यांच्या निस्वार्थ सेवेला मानाचा मुजरा करणे हीच खरी कृतज्ञता आहे,” असे सांगत त्यांनी उपस्थित सर्व शिक्षकांना शिक्षक दिनाच्या मनःपूर्वक शुभेच्छा दिल्या.

या सन्मान सोहळ्यामुळे सेवानिवृत्त शिक्षकांच्या प्रदीर्घ कार्याला उजाळा मिळाला. सन्मान स्वीकारताना अनेक शिक्षकांच्या चेहऱ्यावर समाधान, अभिमान आणि आनंदाचे भाव पाहायला मिळाले. कार्यक्रमाने शिक्षकांच्या कार्याप्रती असलेला आदर आणि कृतज्ञतेची भावना अधिक दृढ केली.

यावेळी संघटनेचे पदाधिकारी, सेवानिवृत्त शिक्षक, शिक्षकेतर कर्मचारी, अधिकारी तसेच विविध क्षेत्रातील मान्यवर मोठ्या संख्येने उपस्थित होते.