🔊 मूलमध्ये डीजेचा ‘आवाज’ महागात! सहा डीजे, सहा वाहने जप्त; १० जणांवर गुन्हे दाखल

🔊 मूलमध्ये डीजेचा ‘आवाज’ महागात! सहा डीजे, सहा वाहने जप्त; १० जणांवर गुन्हे दाखल

परमेश्वरी दुर्गा मंडळावरही पोलिसांची कारवाई; ९४.५० लाखांचा मुद्देमाल जप्त

न्यूज जागर | जिल्हा प्रतिनिधी, मूल

मूल : दुर्गादेवी विसर्जन मिरवणुकीत डीजेचा आवाज वाढवून जल्लोष करण्याचा उत्साह काही जणांना चांगलाच महागात पडला! निर्धारित मर्यादेपेक्षा अधिक आवाजात डीजे वाजविल्याप्रकरणी मूल पोलिसांनी तब्बल १० जणांविरुद्ध चार स्वतंत्र गुन्हे दाखल केले आहेत. या कारवाईत सहा डीजे साउंड सिस्टीम आणि त्यासाठी वापरण्यात आलेली सहा वाहने जप्त करण्यात आली असून, जप्त मुद्देमालाची एकूण किंमत तब्बल ९४ लाख ५० हजार रुपये असल्याची माहिती पोलिसांनी दिली. या कारवाईत मूल शहरातील याच वर्षी नव्याने चर्चित आलेल्या परमेश्वरी दुर्गा मंडळाचाही समावेश असल्याने शहरात या प्रकरणाची चर्चा रंगली आहे.

🔴डीजेचा आवाज वाढला अन् पोलिसांची कारवाई सुरू!

२४ ऑक्टोबर २०२६ रोजी मूल शहरात शारदा व दुर्गादेवी विसर्जन मिरवणुका सुरू असताना महात्मा फुले चौक ते गांधी चौक परिसरात काही डीजे निर्धारित ध्वनीमर्यादेपेक्षा अधिक आवाजात वाजविले जात असल्याचे पोलिसांच्या निदर्शनास आले. विसर्जन बंदोबस्तादरम्यान गस्तीवर असलेल्या पोलिसांनी परिस्थितीची h घेत संबंधित डीजे चालक व मालकांविरुद्ध कारवाई केली.

चंद्रपूरचे पोलीस अधीक्षक आयुष नोपाणी यांच्या निर्देशानुसार ही कारवाई करण्यात आली. सणाचा उत्साह असला तरी ध्वनिप्रदूषणाच्या नियमांकडे दुर्लक्ष करणे परवडणारे नसल्याचा संदेश या कारवाईतून देण्यात आला आहे.

🔴१० जणांवर गुन्हे; चर्चित मंडळाचाही समावेश

या प्रकरणी प्रवीण मुर्लीधर खानोरकर (४५), पंकज गणपत नैताम (३५), उमेश महादेवजी हुंडे (३५), रोहित विजय झुमडे (३०), वैशाली सचिन घोगरे (३५), यश विश्वास बोलिवार (३०), पुष्पलाबाई विष्णू बालकोंडे (६३), सुजित शरद रेड्डीवार (३६), नंदनी गणेश रामशेट्टीवार (३५) आणि मनीष अशोक खोब्रागडे (२५) यांच्याविरुद्ध गुन्हे दाखल करण्यात आले आहेत.

पोलिसांनी दिलेल्या माहितीनुसार, संबंधित प्रकरणांमध्ये भारतीय न्याय संहिता कलम २२३ सहकलम ३८ तसेच महाराष्ट्र पोलीस अधिनियमाच्या कलम १३६ अंतर्गत चार स्वतंत्र गुन्हे नोंदविण्यात आले आहेत.

🔴जप्तीचा आकडा पाहून डोळे विस्फारतील!

पोलिसांच्या कारवाईत डीजे साउंड सिस्टीम, बेस, टॉप स्पीकर्स, मिक्सर, जनरेटर आणि अन्य संबंधित साहित्य जप्त करण्यात आले. याशिवाय डीजेसाठी वापरण्यात आलेली सहा वाहने ही ताब्यात घेण्यात आली.

जप्त मुद्देमालाचा तपशील :

डीजे साहित्य : ३० लाख ४५ हजार रुपये

सहा वाहने : ६४ लाख रुपये

एकूण किंमत : ९४ लाख ४५ हजार रुपये

🔴वरिष्ठांच्या मार्गदर्शनाखाली कारवाई

पोलीस अधीक्षक आयुष नोपाणी, अपर पोलीस अधीक्षक ईश्वर काटकडे आणि उपविभागीय पोलीस अधिकारी सत्यजित आमले यांच्या मार्गदर्शनाखाली पोलीस निरीक्षक विजय राठोड तसेच मूल पोलीस ठाण्यातील अधिकारी व अंमलदारांनी ही कारवाई केली.

🔴उत्सवाचा आनंद घ्या; पण नियमांचे भान ठेवा!

सार्वजनिक उत्सव आणि मिरवणुकांमध्ये जल्लोष करणे स्वाभाविक असले, तरी ध्वनीमर्यादांचे पालन करणेही तितकेच महत्त्वाचे आहे. ध्वनिप्रदूषणामुळे नागरिकांना त्रास होऊ नये आणि सार्वजनिक शांतता व कायदा-सुव्यवस्था अबाधित राहावी, यासाठी डीजे व ध्वनिक्षेपकांचा वापर निर्धारित नियमांनुसारच करावा, असे आवाहन मूल पोलिसांनी केले आहे.

🟧🟧🟧🟧🟧🟧🟧🟧🟧🟧🟧🟧🟧🟧🟧🟧

News Jagar..

बातमी आणि जाहिरातीसाठी संपर्क साधा..

चेतन कामडे मूल.

 न्यूज जागर.. 

चंद्रपूर जिल्हा प्रतिनिधी.

संपर्क. ९३०७५५३०१४

🔴🔴🔴🔴🔴🔴🔴🔴🔴🔴