विदर्भात मान्सूनचा जोर वाढणार; २२ जुलैपर्यंत मुसळधार पावसाचा इशारा, वीजांच्या कडकडाटासह ताशी ६० किमी वेगाने वारे

गडचिरोली | जिल्हा प्रतिनिधी

भारतीय हवामान विभागाने विदर्भासाठी पुढील सहा दिवसांचा महत्त्वाचा हवामान अंदाज जाहीर केला असून, १७ ते २२ जुलै २०२६ या कालावधीत संपूर्ण विदर्भात मान्सून अधिक सक्रिय राहणार असल्याचा अंदाज व्यक्त करण्यात आला आहे. 

विशेषतः १७ ते २० जुलै दरम्यान मुसळधार पाऊस, विजांचा कडकडाट आणि ताशी ४० ते ६० किलोमीटर वेगाने वारे वाहण्याची शक्यता असल्याने नागरिकांना सतर्क राहण्याचे आवाहन करण्यात आले आहे.

हवामान विभागाच्या माहितीनुसार, १७ ते १९ जुलै या कालावधीत विदर्भातील अनेक ते बहुतांश भागांत पावसाची शक्यता आहे. त्यानंतर २० ते २२ जुलै दरम्यान पावसाचा जोर आणखी वाढून बहुतांश ठिकाणी व्यापक ते अत्यंत व्यापक स्वरूपाचा मुसळधार पाऊस पडण्याचा अंदाज आहे.

याशिवाय १७ आणि १८ जुलै रोजी विदर्भातील काही भागांत मुसळधार पावसाचा इशारा देण्यात आला आहे. १७ ते २० जुलै या चार दिवसांत विजांच्या कडकडाटासह वादळी पाऊस पडण्याची शक्यता असून, ताशी ४० ते ५० किलोमीटर वेगाने वारे, तर काही ठिकाणी ६० किलोमीटर प्रतितास वेगाचे झोत अनुभवायला मिळू शकतात.

हवामान विभागाने नागरिकांना अनावश्यक प्रवास टाळण्याचा, वीजांचा कडकडाट सुरू असताना सुरक्षित ठिकाणी आश्रय घेण्याचा तसेच शेतकरी, मच्छीमार आणि नदी-नाल्यांच्या परिसरातील नागरिकांनी विशेष सतर्कता बाळगण्याचा सल्ला दिला आहे.

महत्त्वाचे मुद्दे

१७ ते २२ जुलै: विदर्भात मान्सून सक्रिय.

१७ व १८ जुलै: मुसळधार पावसाचा इशारा.

१७ ते २० जुलै: वीजांचा कडकडाट, वादळी पाऊस आणि ताशी ४०–६० किमी वेगाचे वारे.

नागरिकांनी हवामान विभागाच्या सूचनांचे पालन करून आवश्यक खबरदारी घ्यावी.