गडचिरोलीत पदवीधर मेळाव्याला उत्स्फूर्त प्रतिसाद!

महसूलमंत्री चंद्रशेखर बावनकुळे यांचे सुधाकर कोहळे यांच्या विजयासाठी आवाहन; पदवीधरांच्या प्रश्नांवर महायुतीचा भर

माजी खासदार डॉ. अशोक नेते यांचाही पदवीधरांच्या समस्या सोडविण्यासाठी पाठपुराव्याचा निर्धार

नितेश गट्टीवार|जिल्हा प्रतिनिधी 

गडचिरोली,दि. १७ ऑक्टोबर: नागपूर विभाग पदवीधर मतदारसंघ निवडणूक २०२६ च्या पार्श्वभूमीवर महायुतीचे अधिकृत उमेदवार सुधाकर विठ्ठलराव कोहळे यांच्या प्रचारार्थ गडचिरोली शहरातील आरमोरी रोडवरील सुमानंद सभागृहात आयोजित पदवीधर मेळाव्याला उत्स्फूर्त प्रतिसाद मिळाला. महायुतीच्या विविध घटक पक्षांचे पदाधिकारी, लोकप्रतिनिधी, कार्यकर्ते आणि पदवीधर मतदारांच्या उपस्थितीत पार पडलेल्या या मेळाव्यात पदवीधरांचे प्रश्न, बेरोजगारी, शिक्षण क्षेत्रातील अडचणी आणि तरुणांच्या भवितव्याशी संबंधित विषयांवर चर्चा करण्यात आली. यावेळी महसूलमंत्री चंद्रशेखर बावनकुळे यांनी सुधाकर कोहळे यांना विजयी करण्याचे आवाहन केले, तर माजी खासदार डॉ. अशोक नेते यांनी पदवीधरांच्या प्रश्नांना न्याय देण्यासाठी महायुती कटिबद्ध असल्याची भूमिका मांडली.

पदवीधरांच्या प्रश्नांसाठी सक्षम नेतृत्वाला साथ द्या!

महसूलमंत्री चंद्रशेखर बावनकुळे यांचे आवाहन

मेळाव्याला संबोधित करताना राज्याचे महसूलमंत्री चंद्रशेखर बावनकुळे यांनी पदवीधर मतदारसंघाच्या निवडणुकीचे महत्त्व अधोरेखित केले. पदवीधरांच्या समस्या समजून घेऊन त्या योग्य व्यासपीठावर प्रभावीपणे मांडणारे आणि त्यांच्या निराकरणासाठी सातत्याने प्रयत्न करणारे नेतृत्व निवडण्याची गरज असल्याचे त्यांनी सांगितले.

सुधाकर कोहळे यांना दिलेले मत हे विकासाच्या भूमिकेला बळ देणारे ठरेल, अशी भूमिका मांडत त्यांनी पदवीधर मतदारांनी निवडणुकीत सक्रिय सहभाग नोंदवावा आणि महायुतीच्या उमेदवाराला पाठिंबा द्यावा, असे आवाहन केले.

सन २०२० मधील पदवीधर मतदारसंघाच्या निवडणुकीचा संदर्भ देत बावनकुळे यांनी त्यावेळच्या राजकारणावर टीका केली. विरोधकांनी जातीयवादाचा आधार घेत जनतेची दिशाभूल केल्याचा आरोपही त्यांनी केला.

आपल्या ३४ वर्षांच्या राजकीय कार्यकाळाचा उल्लेख करताना त्यांनी राजकारण हे जाती-पातीच्या पलीकडे जाऊन समाजातील सर्व घटकांच्या समस्या सोडविण्यासाठी आणि जनतेची सेवा करण्यासाठी असले पाहिजे, असे मत व्यक्त केले. सर्व समाजघटकांना सोबत घेऊन विकास साधण्याची भूमिका त्यांनी मांडली.

धान उत्पादक शेतकऱ्यांना बोनस देण्याचे आश्वासन

राज्यातील दुष्काळी परिस्थिती, शेतकऱ्यांच्या अडचणी आणि धान उत्पादकांच्या प्रश्नांवरही बावनकुळे यांनी भाष्य केले. राज्य सरकार शेतकऱ्यांच्या पाठीशी ठामपणे उभे असल्याचे सांगत धान उत्पादक शेतकऱ्यांना बोनस देण्यात आला असून, यंदाही धानाचा बोनस देण्यात येईल, असे आश्वासन त्यांनी दिले.

मुख्यमंत्री देवेंद्र फडणवीस यांच्या नेतृत्वाखाली राज्याच्या सर्वांगीण विकासासोबतच शेतकरीहिताच्या निर्णयांना प्राधान्य दिले जात असल्याचे त्यांनी नमूद केले. पदवीधरांच्या अपेक्षा, रोजगाराच्या संधी आणि विकासाशी निगडित प्रश्नांना प्राधान्य देण्यासाठी सुधाकर कोहळे यांना पाठिंबा देण्याचे आवाहनही त्यांनी केले.

पदवीधरांच्या प्रश्नांसाठी सातत्यपूर्ण पाठपुरावा आवश्यक!

डॉ. अशोक नेते यांचे प्रतिपादन

माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोक नेते यांनीही मेळाव्याला संबोधित करत पदवीधरांच्या प्रश्नांवर आपली भूमिका स्पष्ट केली.

पदवीधर मतदारसंघ हा सुशिक्षित, अभ्यासू आणि जाणकार मतदारांचा मतदारसंघ आहे. त्यामुळे पदवीधरांच्या अपेक्षा, समस्या आणि मागण्या समजून घेऊन त्या प्रभावीपणे मांडणारे नेतृत्व आवश्यक असल्याचे डॉ. नेते यांनी सांगितले.

महायुतीचे अधिकृत उमेदवार सुधाकर विठ्ठलराव कोहळे यांच्याकडे पदवीधरांच्या प्रश्नांवर काम करण्याची क्षमता असून, त्यांच्या समस्या सोडविण्यासाठी सातत्याने पाठपुरावा करण्याची आवश्यकता त्यांनी अधोरेखित केली.

शिक्षण क्षेत्रातील अडचणी, सुशिक्षित बेरोजगारांचे प्रश्न, रोजगाराच्या संधी आणि तरुणांच्या भवितव्याशी संबंधित विषयांना प्राधान्य मिळाले पाहिजे, असे मत त्यांनी व्यक्त केले. पदवीधरांच्या हितासाठी महायुतीच्या माध्यमातून प्रयत्न करण्याची भूमिका मांडत त्यांनी सुधाकर कोहळे यांना भरघोस मतांनी विजयी करण्याचे आवाहन केले.

दिग्गज नेत्यांची उपस्थिती; प्रचाराला गती देण्यावर भर

या पदवीधर मेळाव्याला माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोक नेते, चिमूर विधानसभा क्षेत्राचे आमदार बंटीभाऊ तथा कीर्तिकुमार भांगडिया, भाजपाचे नेते संजयजी कुटे, आमदार डॉ. मिलिंद नरोटे, भाजपा जिल्हाध्यक्ष रमेशजी बारसागडे, माजी आमदार तथा आदिवासी आघाडीचे प्रदेशाध्यक्ष डॉ. देवरावजी होळी, माजी आमदार कृष्णा गजबे, नगराध्यक्ष ॲड. प्रणोती निंबोरकर, माजी आमदार डॉ. नामदेवराव उसेंडी, माजी जिल्हाध्यक्ष तथा पदवीधर जिल्हा प्रमुख प्रशांतजी वाघरे, सहकार महर्षी अरविंदजी सा. पोरेड्डीवार, भाजपाचे ज्येष्ठ नेते बाबुरावजी कोहळे, माजी जिल्हाध्यक्ष किसनजी नागदेवे, राष्ट्रवादी काँग्रेसचे जिल्हाध्यक्ष रवींद्र वासेकर, शिवसेनेचे जिल्हाप्रमुख सुरेंद्रसिंह चंदेल, शिवसेनेचे नेते संदीप ठाकूर, भाजपा नेत्या डॉ. चंदाताई कोडवते आणि आरटीआयचे नेते मेघश्याम घुटके यांची प्रमुख उपस्थिती होती.

याशिवाय जिल्हा महामंत्री गोविंद सारडा, प्रकाश गेडाम, सदानंद कुथे, अनिल पोहनकर, सुरावार सर आणि रिंकू पापडकर यांच्यासह महायुतीच्या विविध घटक पक्षांचे पदाधिकारी, कार्यकर्ते आणि पदवीधर मतदार मोठ्या संख्येने उपस्थित होते.

पदवीधरांचे प्रश्न आणि रोजगाराच्या मुद्द्यांवर लक्ष

नागपूर विभाग पदवीधर मतदारसंघाच्या निवडणुकीच्या पार्श्वभूमीवर आयोजित या मेळाव्यात पदवीधरांच्या समस्या, शिक्षण, रोजगार आणि विकासाच्या मुद्द्यांवर भर देण्यात आला. महायुतीच्या नेत्यांनी आपल्या भाषणांतून उमेदवार सुधाकर कोहळे यांच्या समर्थनार्थ भूमिका मांडत पदवीधर मतदारांशी संवाद साधला.

या मेळाव्याच्या माध्यमातून पदवीधरांच्या प्रश्नांना निवडणुकीच्या चर्चेच्या केंद्रस्थानी आणण्याचा प्रयत्न करण्यात आला. उपस्थित पदाधिकारी आणि कार्यकर्त्यांनी उमेदवाराच्या प्रचाराला गती देण्यासाठी प्रयत्न करण्याची भूमिका व्यक्त केली.