सुभाषग्राममध्ये शारदीय दुर्गा पूजा उत्सवाची जय्यत तयारी!

१९६७ पासूनची परंपरा यंदाही दिमाखात; १६ ते २१ ऑक्टोबरदरम्यान विविध सांस्कृतिक कार्यक्रमांची मेजवानी!

नितेश गट्टीवार|जिल्हा प्रतिनिधी 

गडचिरोली (सुभाषग्राम) : भक्ती, श्रद्धा आणि सांस्कृतिक परंपरेचा संगम असलेल्या शारदीय दुर्गा पूजा उत्सवाची सुभाषग्राम येथे जय्यत तयारी सुरू असून, संपूर्ण परिसरात उत्साहाचे वातावरण निर्माण झाले आहे. नेताजी सांस्कृतिक तथा क्रीडा मंडळ, सुभाषग्राम (नोंदणी क्र. १४३/२०१६) यांच्या वतीने आयोजित करण्यात येणारा सार्वजनिक श्री श्री दुर्गा पूजा उत्सव यंदा १६ ते २१ ऑक्टोबर २०२६ या कालावधीत मोठ्या थाटामाटात साजरा होणार आहे.

विशेष म्हणजे, १९६७ पासून अखंडपणे जपली जाणारी ही दुर्गापूजेची परंपरा आजही तितक्याच श्रद्धेने आणि उत्साहाने पुढे नेली जात आहे. धार्मिक एकोपा, सामाजिक बांधिलकी आणि सांस्कृतिक वारसा जपणारा हा उत्सव सुभाषग्रामच्या वैभवात भर घालणारा ठरत आहे.

धार्मिक विधींसह सांस्कृतिक कार्यक्रमांची रेलचेल!

उत्सवाच्या निमित्ताने षष्ठी, सप्तमी, अष्टमी, नवमी आणि दशमी या तिथींना विधिवत पूजा-अर्चा करण्यात येणार आहे. देवीच्या दर्शनासाठी भाविकांची मोठी गर्दी होण्याची शक्यता असून, उत्सवाच्या प्रत्येक दिवशी विविध सांस्कृतिक कार्यक्रमांचे आयोजन करण्यात आले आहे.

यंदाच्या उत्सवात मीरा बाई झांकी ग्रुप, ‘संतान हारा माँ’ नाटक, मधुमिता बाउल संगीत, चंद्रा डान्स ग्रुप तसेच कोलकाता येथील शिल्पी कलाकारांचे लोकगीत हे कार्यक्रम आकर्षणाचे केंद्र ठरणार आहेत. धार्मिक कार्यक्रमांसोबतच कला, संगीत, नृत्य आणि लोकसंस्कृतीची मेजवानी भाविकांना अनुभवता येणार आहे.

भाविकांसाठी महाप्रसाद आणि भंडाऱ्याचेही आयोजन करण्यात आले आहे. त्यामुळे हा उत्सव केवळ धार्मिक सोहळा न राहता सामाजिक एकात्मता आणि बंधुभाव वृद्धिंगत करणारा उत्सव ठरणार आहे.

मंडळाच्या पदाधिकाऱ्यांसह सदस्यांची मेहनत

उत्सव यशस्वी करण्यासाठी नेताजी सांस्कृतिक तथा क्रीडा मंडळाचे पदाधिकारी आणि सदस्य परिश्रम घेत आहेत. मंडळाचे अध्यक्ष समीर रॉय व नितिश बाईद, सचिव समर देवनाथ, मृत्युंजय विश्वास व प्रहलाद रॉय, तसेच कोषाध्यक्ष सर्वजीत ढाली व अभिजीत वैद्य यांच्या मार्गदर्शनाखाली उत्सवाची तयारी सुरू आहे.

याशिवाय मानिक दास, बिकाश मंडल, रंजीत हलदार, रितेश सरकार, सजीब रॉय, निरंजन बाडाय, टिंकू मजुमदार, विजय बाला, जितू दास, मिथुन हलदार, राहुल हलदार, विश्वजीत साना, गुरुपद मंडल, उत्तम रॉय, दिपक रायड, इंद्रजीत सरकार, संजय हलदार, करण सरकार, अरविंद दास, मनोभिरम मंडल, अनिरुद्ध सरकार, नितीश रॉय आणि अपूर्व मंडल यांच्यासह मंडळाचे इतर सदस्य उत्सवाच्या यशस्वितेसाठी मेहनत घेत आहेत.

भाविकांना उत्सवात सहभागी होण्याचे आवाहन

१९६७ पासून सुरू असलेली दुर्गापूजेची परंपरा जपत यंदाही उत्सव भक्तिभावाने आणि उत्साहात साजरा करण्यासाठी मंडळ सज्ज झाले आहे. या उत्सवाच्या माध्यमातून धार्मिक श्रद्धेसोबतच सामाजिक सलोखा, सांस्कृतिक जतन आणि गावातील एकजूट अधिक दृढ होणार आहे.

सुभाषग्राममधील या ऐतिहासिक दुर्गा पूजा उत्सवात सर्व भाविक भक्तांनी, ग्रामस्थांनी आणि परिसरातील नागरिकांनी मोठ्या संख्येने सहभागी व्हावे, श्री श्री दुर्गामातेचे दर्शन घ्यावे आणि विविध सांस्कृतिक कार्यक्रमांचा आनंद लुटावा, असे आवाहन नेताजी सांस्कृतिक तथा क्रीडा मंडळाच्या वतीने करण्यात आले आहे.