तालुक्यात वाघाच्या हल्ल्यात ७० वर्षीय वृद्ध महिलेचा मृत्यू; परिसरात दहशत

कृपया शेयर करा

एटापल्ली : गडचिरोली जिल्ह्यातील एटापल्ली तालुक्यात वाघाच्या हल्ल्याच्या घटनांमध्ये पुन्हा एकदा वाढ होत असल्याचे चित्र समोर आले असून, इरपनपायली येथे वाघाच्या हल्ल्यात एका ७० वर्षीय वृद्ध महिलेचा दुर्दैवी मृत्यू झाल्याची घटना घडली आहे. सर्वत्र विजयादशमीचा उत्सव सुरू असताना घडलेल्या या घटनेमुळे परिसरात शोककळा पसरली असून, नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, मृत महिलेचे नाव बिलाशी आनंद बा. असे आहे. त्या एटापल्ली तालुक्यातील सरखेडा ग्रामपंचायतीअंतर्गत येणाऱ्या इरपनपायली गावातील रहिवासी होत्या. धान कापणीच्या कामासाठी त्या गावाजवळील शेतात गेल्या असताना दबा धरून बसलेल्या वाघाने त्यांच्यावर अचानक हल्ला केला. या हल्ल्यात गंभीर जखमी झाल्याने त्यांचा घटनास्थळीच मृत्यू झाल्याची माहिती समोर आली आहे.

या दुर्दैवी घटनेमुळे इरपनपायलीसह आसपासच्या गावांतील नागरिकांमध्ये भीतीचे वातावरण निर्माण झाले आहे. विशेषतः शेतात धान कापणी, शेतीची इतर कामे तसेच जंगलालगतच्या परिसरात जाणाऱ्या नागरिकांच्या सुरक्षिततेचा प्रश्न पुन्हा ऐरणीवर आला आहे. सध्या धान कापणीचा हंगाम सुरू असल्याने शेतकऱ्यांना शेतात जाणे आवश्यक आहे. मात्र, वाघाच्या वाढत्या वावरामुळे शेतात काम करण्यासाठी जाणाऱ्या नागरिकांच्या मनात भीती निर्माण झाली आहे.

वनविभागाच्या उपाययोजनांवर प्रश्नचिन्ह

एटापल्ली तालुक्यात यापूर्वीही वन्यप्राण्यांच्या हल्ल्यांच्या घटना घडल्याने मानव-वन्यजीव संघर्षाचा प्रश्न गंभीर बनत चालला आहे. या पार्श्वभूमीवर वाघाच्या हल्ल्यात वृद्ध महिलेचा मृत्यू झाल्याने वनविभागाच्या प्रतिबंधात्मक उपाययोजनांबाबत ग्रामस्थांकडून नाराजी व्यक्त केली जात आहे.

वाघाच्या वावरावर लक्ष ठेवणे, संवेदनशील भागातील नागरिकांना सतर्क करणे, गावांमध्ये जनजागृती करणे आणि संभाव्य हल्ले टाळण्यासाठी प्रभावी उपाययोजना राबविण्याची मागणी होत आहे.

दरम्यान, या घटनेनंतर वनविभागाने परिसरातील नागरिकांच्या सुरक्षिततेला प्राधान्य देऊन आवश्यक ती खबरदारी घ्यावी, अशी अपेक्षा व्यक्त केली जात आहे. मृत महिलेच्या कुटुंबीयांना शासनाकडून नियमानुसार आर्थिक मदत मिळावी, तसेच भविष्यात अशा घटना टाळण्यासाठी ठोस उपाययोजना कराव्यात, अशी मागणी ग्रामस्थांकडून होण्याची शक्यता आहे.