भेंडाळ्यात ७० वा धम्मचक्र प्रवर्तन दिन उत्साहात साजरा!

  तथागत गौतम बुद्धांच्या विचारांचा जयघोष; रॅलीसह चिमुकल्यांना पुस्तक-पेन वाटप

प्रलय सहारे

भेंडाळा,दि.२० ऑक्टोबर :जगाला शांती, समता, बंधुता आणि मानवतेचा मार्ग दाखविणारे तथागत गौतम बुद्ध यांच्या विचारांना अभिवादन करत भेंडाळा येथे ७० वा धम्मचक्र प्रवर्तन दिन उत्साहात साजरा करण्यात आला. या निमित्ताने गावातून भव्य रॅली काढण्यात आली. तसेच लहान मुलांना पुस्तक आणि पेनचे वाटप करून शिक्षणाचे महत्त्व अधोरेखित करण्यात आले.

धम्मचक्र प्रवर्तन दिनानिमित्त भेंडाळा येथे उत्साहपूर्ण वातावरण निर्माण झाले होते. तथागत गौतम बुद्ध यांच्या शांतता, करुणा आणि समतेच्या संदेशाचा प्रसार करण्याच्या उद्देशाने आयोजित रॅलीतून सामाजिक एकता आणि बंधुभावाचा संदेश देण्यात आला.

शिक्षणातून प्रगतीचा संदेश!

या कार्यक्रमाचे विशेष आकर्षण म्हणजे लहान मुलांना पुस्तक आणि पेनचे वाटप. शिक्षण हेच प्रगतीचे प्रभावी साधन असून, मुलांनी शिक्षणाच्या माध्यमातून स्वतःचे आणि समाजाचे भविष्य उज्ज्वल करावे, हा संदेश या उपक्रमातून देण्यात आला.

तथागत गौतम बुद्धांनी दिलेला शांती, अहिंसा, करुणा आणि समतेचा विचार आजही समाजासाठी मार्गदर्शक आहे. त्यांच्या विचारांचे आचरण करून समाजात बंधुभाव, सलोखा आणि मानवतेची भावना अधिक दृढ व्हावी, असा संदेश या निमित्ताने देण्यात आला.

रॅली आणि शैक्षणिक साहित्य वाटपाच्या उपक्रमामुळे भेंडाळा येथे ७० वा धम्मचक्र प्रवर्तन दिन उत्साहपूर्ण वातावरणात साजरा झाला.