महिला शेतकऱ्यांना आता मिळणार अधिकृत ओळख!

प्रमाणपत्रासाठी ऑनलाइन अर्ज करा; कृषी योजना, कर्ज, विमा व शासकीय सुविधांचा लाभ होणार सुलभ — साईनाथ बुरांडे

नितेश गट्टीवार|जिल्हा प्रतिनिधी

गडचिरोली (चामोर्शी),२० सप्टेंबर: शेतीच्या प्रत्येक टप्प्यावर मोलाचे योगदान देणाऱ्या महिला शेतकऱ्यांना आता अधिकृत ओळख मिळण्याचा मार्ग मोकळा झाला आहे. महाराष्ट्र शासनाने ‘महाराष्ट्र महिला शेतकरी सक्षमीकरण अधिनियम, २०२६’ अंतर्गत महिला शेतकरी प्रमाणपत्रासाठी ऑनलाइन सुविधा उपलब्ध करून दिली असून, जिल्ह्यातील पात्र महिलांनी या संधीचा लाभ घेत तातडीने ऑनलाइन अर्ज करावा, असे आवाहन भाजपा किसान मोर्चाचे जिल्हा महामंत्री साईनाथ बुरांडे यांनी केले आहे.

महिला शेतकऱ्यांचे शेतीतील प्रत्यक्ष योगदान अधिकृतरीत्या नोंदविणे, त्यांची स्वतंत्र शेतकरी ओळख निर्माण करणे आणि अधिकृत डेटाबेस तयार करणे, हा या उपक्रमाचा प्रमुख उद्देश आहे. महिला शेतकरी प्रमाणपत्रामुळे पात्र महिलांना विविध कृषी योजना, कृषी कर्ज, पीक व इतर विमा सुविधा, कृषी निविष्ठा, कृषी विस्तार सेवा तसेच विविध शासकीय कल्याणकारी योजनांचा लाभ मिळविणे अधिक सुलभ होण्यास मदत होणार आहे.

जमीन नावावर असणे बंधनकारक नाही

महिला शेतकरी म्हणून मान्यता मिळण्यासाठी केवळ महिलेच्या नावावर जमीन असणे आवश्यक नाही. शेती व शेतीपूरक व्यवसायात प्रत्यक्ष सहभाग हा महत्त्वाचा आधार मानण्यात आला आहे. त्यामुळे स्वतःच्या नावावर जमीन नसली, तरी शेतीच्या कामात प्रत्यक्ष योगदान देणाऱ्या पात्र महिलांनाही अधिकृत शेतकरी ओळख मिळण्याची तरतूद आहे.

पिकांची लागवड, बीजोत्पादन, पशुसंवर्धन, दुग्ध व्यवसाय, कुक्कुटपालन, मत्स्यव्यवसाय, मधुमक्षिकापालन, रेशीम उत्पादन, फलोत्पादन, पुष्पोत्पादन, अळंबी लागवड, कृषी-वनीकरण, कंपोस्ट निर्मिती यांसह विविध शेती व शेतीपूरक व्यवसायांमध्ये प्रत्यक्ष सहभागी असलेल्या महिलांना या उपक्रमाचा लाभ घेता येणार आहे.

याशिवाय भाडेपट्ट्याने किंवा बटाईने शेती करणाऱ्या महिला, भूमिहीन शेतकरी, भूमिहीन पशुपालक, शेतमजूर, रोपमळा मजूर आणि पशुचारक यांचाही या व्यापक उपक्रमात समावेश करण्यात आला आहे. त्यामुळे जमिनीची मालकी नसतानाही शेती क्षेत्रात प्रत्यक्ष श्रम करणाऱ्या महिलांना अधिकृत ओळख मिळण्याची मोठी संधी उपलब्ध झाली आहे.

१७ सप्टेंबर ते १७ ऑक्टोबरदरम्यान जनजागृती अभियान

महिला शेतकऱ्यांपर्यंत या योजनेची माहिती पोहोचविण्यासाठी दि. १७ सप्टेंबर ते १७ ऑक्टोबर २०२६ या कालावधीत ‘सेवा संकल्प अभियान’ राबविण्यात येत आहे. या माध्यमातून पात्र महिला शेतकऱ्यांची ओळख पटवून त्यांना महिला शेतकरी प्रमाणपत्रासाठी ऑनलाइन अर्ज करण्यास प्रोत्साहित केले जात आहे.

गडचिरोली जिल्ह्यात ग्रामीण तसेच दुर्गम भागातील असंख्य महिला शेती आणि शेतीपूरक व्यवसायात प्रत्यक्ष योगदान देतात. त्यामुळे या उपक्रमाची माहिती गावागावांत पोहोचवून पात्र महिलांना अर्ज प्रक्रियेसाठी मार्गदर्शन करणे गरजेचे असल्याचे बुरांडे यांनी म्हटले आहे.

कृषी विभागाच्या संकेतस्थळावर ऑनलाइन अर्ज

पात्र महिला शेतकऱ्यांनी महाराष्ट्र कृषी विभागाच्या अधिकृत संकेतस्थळावर जाऊन महिला शेतकरी प्रमाणपत्रासाठी ऑनलाइन अर्ज करावा. अर्ज करण्यापूर्वी पोर्टलवर दिलेली पात्रता, आवश्यक कागदपत्रे आणि अर्ज प्रक्रियेची अधिकृत माहिती काळजीपूर्वक तपासावी, असे आवाहन करण्यात आले आहे.

“महिलांच्या कष्टांना मिळणार अधिकृत ओळख”

“शेतीच्या प्रत्येक टप्प्यावर महिला शेतकऱ्यांचे योगदान अत्यंत मोलाचे आहे. मात्र अनेकदा प्रत्यक्ष शेती करणाऱ्या महिलांना शेतकरी म्हणून अधिकृत ओळख मिळत नाही. महाराष्ट्र महिला शेतकरी सक्षमीकरण अधिनियमामुळे अशा महिलांना स्वतंत्र ओळख मिळण्यास मदत होणार आहे. त्यामुळे गडचिरोली जिल्ह्यातील पात्र महिला शेतकऱ्यांनी या संधीचा लाभ घेत महिला शेतकरी प्रमाणपत्रासाठी ऑनलाइन अर्ज करावा,” असे आवाहन साईनाथ बुरांडे, जिल्हा महामंत्री, भाजपा किसान मोर्चा, गडचिरोली यांनी केले.

महिला शेतकऱ्यांना अधिकृत ओळख मिळाल्यामुळे भविष्यात कृषी योजना, कर्ज, विमा आणि शेतीशी संबंधित विविध शासकीय सुविधांपर्यंत त्यांचा प्रवेश अधिक सुलभ होण्यास मदत होणार आहे. त्यामुळे हे प्रमाणपत्र केवळ कागदपत्र न राहता महिलांच्या शेतीतील श्रम आणि योगदानाची अधिकृत नोंद ठरणार असल्याने पात्र महिलांनी या उपक्रमाचा लाभ घ्यावा, असे आवाहन करण्यात आले आहे.