💥*शेतकरी कुटुंबातील निकिताची शिक्षक पदी दमदार भरारी*💥 शेतकरी कुटुंबातील निकिताच्या यशाचे बुद्ध विहारात सत्काराने कौतुक

प्रतिनिधी/रुपेश सलामे

गडचिरोली : प्रतिकूल परिस्थितीवर मात करत मेहनत, जिद्द आणि चिकाटीच्या जोरावर यश संपादन करणाऱ्या निकिता पुरुषोत्तम गेडाम हिची पवित्र पोर्टलच्या नुकत्याच जाहीर झालेल्या निकालात 163 गुणांसह जिल्हा परिषद शाळेत इयत्ता 6 वी ते 8 वी साठी गणित व विज्ञान विषयाच्या शिक्षिका म्हणून भंडारा जिल्ह्यात निवड झाली आहे. तिच्या या उल्लेखनीय यशाबद्दल गडचिरोली येथील फुले वॉर्डातील बुद्ध विहार येथे सत्कार व अभिनंदन कार्यक्रमाचे आयोजन करण्यात आले.

निकिता हिचे वडील शेतकरी असून आई अशिक्षित आहे. घरात मोठ्या सोयी-सुविधा नसतानाही परिस्थितीला दोष न देता तिने आपल्या ध्येयावर लक्ष केंद्रित केले. सातत्यपूर्ण अभ्यास, मेहनत आणि आत्मविश्वासाच्या बळावर तिने हे यश मिळवून आपल्या कुटुंबासह परिसराचे नाव उज्ज्वल केले आहे.

आजच्या काळात विद्यार्थ्यांना शिक्षणासाठी अनेक प्रकारच्या सोयी-सुविधा उपलब्ध आहेत. मात्र, अनेकदा सुविधा असूनही काही विद्यार्थी विविध कारणे व बहाणे सांगताना दिसतात. अशा परिस्थितीत निकिताने मर्यादित परिस्थितीतून पुढे येत मिळवलेले यश हे आजच्या तरुण पिढीसाठी प्रेरणादायी आणि आदर्श ठरणारे आहे. परिस्थिती कितीही कठीण असली तरी जिद्द, मेहनत आणि ध्येय निश्चित असेल तर यश मिळवता येते, हे निकिताने आपल्या कर्तृत्वातून दाखवून दिले आहे.

आपल्या यशाचे श्रेय निकिताने आई-वडील तसेच मोठे भाऊ-बहीण यांना दिले. कुटुंबाने दिलेला आधार, प्रोत्साहन आणि तिच्या शिक्षणासाठी घेतलेले कष्ट यामुळेच आपण आज या टप्प्यावर पोहोचल्याचे तिने सांगितले.

निकिताच्या या यशाची दखल घेत रिपब्लिकन पार्टी ऑफ इंडिया (RPI) चे जिल्हाध्यक्ष मुनीश्वर बोरकर यांच्या पुढाकाराने फुले वॉर्डातील बुद्ध विहार येथे तिचा सत्कार व अभिनंदन कार्यक्रम आयोजित करण्यात आला. यावेळी उपस्थित मान्यवरांनी निकिताचे अभिनंदन करून तिच्या पुढील शैक्षणिक व व्यावसायिक वाटचालीस शुभेच्छा दिल्या.

यावेळी सामाजिक कार्यकर्त्या प्रज्ञा निमगडे, दशरथ साखरे, BAMCEF चे जिल्हाध्यक्ष भोजराज कन्हेकर, रतिमा नागदेवते, आशिष नागदेवते, मनीषा गेडाम, भूषण गेडाम, यांच्यासह RPI व सामाजिक क्षेत्रातील पदाधिकारी, कार्यकर्ते आणि नागरिक मोठ्या संख्येने उपस्थित होते.

ग्रामीण व सर्वसामान्य कुटुंबातील विद्यार्थ्यांनी परिस्थितीची सबब न सांगता शिक्षणाला आपले सामर्थ्य बनवावे आणि निकितासारखे यश संपादन करावे, असा संदेश या सत्कार कार्यक्रमातून देण्यात आला.