गडचिरोली जिल्हा सामान्य रुग्णालयातील रिक्त पदे आणि आरोग्य सुविधांच्या अभावावरून ‘अखिल भारतीय आदिवासी विकास परिषद’ आक्रमक; आ. डॉ. मिलिंद नरोटे यांना दिले निवेदन

प्रतिनिधी / रुपेश सलामे

गडचिरोली:

गडचिरोली जिल्हा सामान्य रुग्णालयात वैद्यकीय पदे रिक्त असल्याने आणि उपचारासाठी आवश्यक असणाऱ्या मूलभूत सुविधांचा अभाव असल्यामुळे रुग्णांचे प्रचंड हाल होत आहेत. या गंभीर समस्येकडे प्रशासनाचे लक्ष वेधण्यासाठी आणि तातडीने उपाययोजना करण्यासाठी ‘अखिल भारतीय आदिवासी विकास परिषद’च्या वतीने गडचिरोली विधानसभा क्षेत्राचे आमदार डॉ. मिलिंद नरोटे यांना अधिकृत निवेदन सादर करण्यात आले. अखिल भारतीय आदिवासी विकास परिषदेचे युवा जिल्हाध्यक्ष कुणाल कोवे यांच्या नेतृत्वाखाली हे निवेदन देण्यात आले आहे.

निवेदनातील मुख्य मुद्दे आणि समस्या:

न्यूरोलॉजिस्ट व वैद्यकीय पदांची कमतरता: गडचिरोली जिल्हा सामान्य हे या जिल्ह्यातील सर्वसामान्य नागरिकांसाठी अत्यंत महत्त्वाचे आरोग्य केंद्र आहे. मात्र, येथील अनेक महत्त्वाची वैद्यकीय पदे रिक्त असल्यामुळे थेट रुग्णसेवेवर विपरीत परिणाम होत आहे. विशेषतः न्यूरोलॉजिस्ट (मेंदू व मज्जासंस्था तज्ज्ञ) उपलब्ध नसल्यामुळे न्यूरोलॉजिकल आजारांनी ग्रस्त रुग्णांना वेळेवर तज्ज्ञ उपचार मिळणे अत्यंत कठीण झाले आहे.

एमआरआय (MRI) सुविधेचा अभाव: रुग्णालयामध्ये एमआरआय तपासणीची सुविधा उपलब्ध नसल्यामुळे गंभीर रुग्णांना आवश्यक तपासणीसाठी इतर ठिकाणी पाठवावे लागत आहे. आपत्कालीन परिस्थितीत यामुळे उपचारास मोठा विलंब होऊ शकतो, ज्यामुळे आर्थिकदृष्ट्या दुर्बल असणाऱ्या रुग्णांना आणि त्यांच्या कुटुंबियांना मोठा त्रास सहन करावा लागतो.

नागरिकांमध्ये वाढती नाराजी: रुग्णालयात मनुष्यबळाची कमतरता आणि आवश्यक वैद्यकीय सुविधांचा अभाव असतानाही रुग्ण प्रशासनाकडून या गंभीर प्रश्नांकडे दुर्लक्ष केले जात असल्याची भावना नागरिकांमध्ये निर्माण झाली आहे. जिल्ह्याची आरोग्य व्यवस्था सांभाळणारे हे प्रमुख शासकीय रुग्णालय असतानाही मूलभूत तज्ज्ञ सेवा आणि निदान सुविधा उपलब्ध नसणे अत्यंत गंभीर बाब असल्याचे निवेदनात म्हटले आहे.

अखिल भारतीय आदिवासी विकास परिषदेच्या प्रमुख मागण्या:

जिल्हा सामान्य रुग्णालयातील रिक्त वैद्यकीय व इतर सर्व आवश्यक पदांचा सविस्तर आढावा घेऊन ती पदे तातडीने भरण्यात यावीत.

रुग्णालयात तातडीने न्यूरोलॉजिस्टची नियुक्ती करावी अथवा नियमित तज्ज्ञ सेवा उपलब्ध करून द्यावी.

जिल्हा सामान्य रुग्णालयात एमआरआय (MRI) तपासणीची सुविधा तातडीने सुरू करण्यात यावी.

रुग्णालयातील उपलब्ध अपुरे मनुष्यबळ व वैद्यकीय सुविधांचा आढावा घेऊन सर्वसामान्य नागरिकांसाठी रुग्णसेवा सुरळीत चालण्यासाठी आवश्यक उपाययोजना कराव्यात.

रुग्णालय प्रशासनाच्या कार्यपद्धतीचा आढावा घेऊन रुग्णांना वेळेत आणि दर्जेदार उपचार मिळतील याची खात्री करावी.

गडचिरोलीसारख्या अतिदुर्गम जिल्ह्यातील सर्वसामान्य नागरिकांना गंभीर आजारांच्या उपचारासाठी इतर जिल्ह्यांमध्ये किंवा बाहेरगावी धाव घ्यावी लागू नये, यासाठी जिल्हा सामान्य रुग्णालय पूर्णपणे सक्षम करणे अत्यंत अत्यावश्यक असल्याचे नमूद करत यावर तात्काळ कार्यवाही करण्याची विनंती कुणाल कोवे यांनी निवेदनाद्वारे केली आहे.