युवा दुर्गा उत्सव मंडळाच्या वतीने रक्तदान शिबिराचे आयोजन; युवकांचा उत्स्फूर्त प्रतिसाद!

आमदार डॉ. मिलिंद नरोटे यांच्या कर्तव्य कक्ष क्रमांक २ कार्यालयात सामाजिक बांधिलकीचा उपक्रम

नितेश गट्टीवार|जिल्हा प्रतिनिधी 

चामोर्शी :रक्तदान हेच श्रेष्ठ दान! सामाजिक बांधिलकी जपत गरजू रुग्णांना मदतीचा हात देण्याच्या उद्देशाने युवा दुर्गा उत्सव मंडळ, चामोर्शी यांच्या वतीने बुधवार, दिनांक १४ ऑक्टोबर रोजी रक्तदान शिबिराचे आयोजन करण्यात आले. गडचिरोली विधानसभा क्षेत्राचे आमदार डॉ. मिलिंदजी नरोटे यांच्या कर्तव्य कक्ष क्रमांक २ कार्यालय, चामोर्शी येथे आयोजित या शिबिराला शहरातील युवकांनी उत्स्फूर्त प्रतिसाद दिला.

रक्ताचा प्रत्येक थेंब एखाद्याला जीवनदान देऊ शकतो, या सामाजिक जाणिवेतून मंडळाने पुढाकार घेत या उपक्रमाचे आयोजन केले. रक्ताची गरज असलेल्या रुग्णांना वेळेवर रक्त उपलब्ध व्हावे आणि समाजात रक्तदानाविषयी जनजागृती व्हावी, हा या उपक्रमामागील मुख्य उद्देश होता.

आजच्या धावपळीच्या जीवनात अनेकदा रक्ताअभावी रुग्णांना अडचणींचा सामना करावा लागतो. अशा परिस्थितीत स्वेच्छेने रक्तदान करणाऱ्या रक्तदात्यांचे योगदान अत्यंत मोलाचे ठरते. याच भावनेतून युवा दुर्गा उत्सव मंडळाच्या कार्यकर्त्यांनी रक्तदान शिबिराच्या माध्यमातून सामाजिक सेवेचा आदर्श निर्माण केला.

या शिबिरात शहरातील युवकांनी सहभाग नोंदवत सामाजिक उत्तरदायित्वाची जाणीव अधोरेखित केली. धार्मिक उत्सवांसोबतच सामाजिक उपक्रमांनाही प्राधान्य देत युवा दुर्गा उत्सव मंडळाने समाजसेवेचा सकारात्मक संदेश दिला.

रक्तदानासारख्या जीवनदायी उपक्रमांमुळे समाजात मदतीची भावना वृद्धिंगत होत असून, युवकांनी अशा सामाजिक कार्यात पुढाकार घेणे ही काळाची गरज असल्याचे या उपक्रमातून अधोरेखित झाले.