एटापल्ली तालुक्यातील १७३ वनहक्क दावेदारांच्या जमिनींची GPS मोजणी करून अभिलेख पुरावा द्या;वाघेझरी ग्रामपंचायतीचा उपविभागीय अधिकाऱ्यांकडे मागणी

पोटखराबा व वनहक्क जमिनींच्या नोंदींचा प्रश्न ऐरणीवर

एटापल्ली: तालुक्यातील कसनसूर परिसरातील वाघेश्वरी ग्रामपंचायतीअंतर्गत येणाऱ्या गावांतील वनहक्क दावेदारांच्या जमिनींच्या मोजणीचा प्रश्न पुन्हा ऐरणीवर आला आहे. वाघेश्वरी ग्रामपंचायतीने संबंधित उपविभागीय अधिकारी, एटापल्ली यांच्याकडे निवेदन सादर करून एकूण १७३ वनहक्क दावेदारांच्या जमिनींची GPS नकाशाद्वारे मोजणी करून मौका पंचनामा करावा आणि त्यांना अभिलेखीय पुरावे उपलब्ध करून द्यावेत, अशी मागणी केली आहे.

ग्रामपंचायतीच्या निवेदनानुसार, वाघेश्वरी स. वाघेश्वरी म., झुरी स. झुरी म. आणि गडरी या गावांतील वनहक्क दावेदारांच्या जमिनींची प्रत्यक्ष मोजणी होणे आवश्यक आहे. संबंधित जमिनींचे अचूक क्षेत्र निश्चित करून नोंदी व पुरावे उपलब्ध झाल्यास दावेदारांना त्यांच्या हक्कांसंबंधीची कागदपत्रे मिळण्यास मदत होऊ शकते.

प्रशासनाने तातडीने कार्यवाही करावी

वनहक्क दावेदारांना त्यांच्या जमिनींच्या मोजणीसाठी आणि अभिलेखीय पुराव्यांसाठी प्रतीक्षा करावी लागू नये, यासाठी संबंधित विभागांनी समन्वय साधून प्रत्यक्ष स्थळपाहणी करावी. GPS नकाशाच्या आधारे मोजणी करून नियमानुसार मौका पंचनामा तयार करावा आणि आवश्यक अभिलेखीय पुरावे उपलब्ध करून द्यावेत, अशी विनंती निवेदनातून करण्यात आली आहे.

या निवेदनाच्या प्रती माहितीसाठी तहसीलदार, उपवनसंरक्षक कार्यालय आलापल्ली तसेच कसनसूर व एटापल्ली येथील वनपरिक्षेत्र अधिकाऱ्यांना देण्यात आल्या आहेत.

आता प्रशासन काय भूमिका घेणार?

१७३ वनहक्क दावेदारांच्या जमिनींच्या मोजणीसंदर्भातील या मागणीवर संबंधित महसूल आणि वनविभाग कोणती कार्यवाही करतात, याकडे स्थानिक नागरिकांचे लक्ष लागले आहे. GPS मोजणी, मौका पंचनामा आणि अभिलेखीय पुरावे उपलब्ध करून देण्याबाबत प्रशासनाने स्पष्ट भूमिका घेऊन कार्यवाही करावी, अशी अपेक्षा व्यक्त होत आहे.