नवरात्रीत महिला शक्तीचा जागर! ७४६ महिला शेतकऱ्यांना मिळणार नवी ओळख!

सहाय्यक कृषी अधिकारी प्रदीप मुंडे यांचा पुढाकार; गावोगावी जनजागृती व अर्ज नोंदणी मोहीम उत्साहात

अड्याळ ते धर्मपूरपर्यंत १३ गावांमध्ये उपक्रम; ग्रामसभेच्या मंजुरीनंतर महिला शेतकऱ्यांच्या सक्षमीकरणाला मिळणार नवी दिशा!

जिल्हा प्रतिनिधी | गडचिरोली

चामोर्शी : नवरात्रीचा उत्सव म्हणजे स्त्रीशक्तीचा जागर, नारीशक्तीचा सन्मान आणि आत्मनिर्भरतेचा संदेश! याच पर्वाचे औचित्य साधून चामोर्शी तालुक्यात महिला शेतकऱ्यांना स्वतंत्र ओळख मिळवून देण्यासाठी कृषी विभागाने महत्त्वपूर्ण पुढाकार घेतला आहे. महाराष्ट्र महिला शेतकरी सक्षमीकरण अधिनियम २०२६ अंतर्गत सहाय्यक कृषी अधिकारी प्रदीप मुंडे यांच्या मार्गदर्शनाखाली तब्बल ७४६ महिला शेतकऱ्यांचे अर्ज तयार करण्याची प्रक्रिया पूर्ण करण्यात आली आहे. त्यांच्या या उपक्रमामुळे शेतीत राबणाऱ्या महिलांच्या योगदानाला अधिकृत मान्यता मिळण्याच्या दिशेने महत्त्वाचे पाऊल पडले आहे.

या मोहिमेत सहाय्यक कृषी अधिकारी प्रदीप मुंडे यांच्यासह समूह सहाय्यक नयन कुमरे आणि तुषार महाकाळकर यांनी सक्रिय सहभाग घेतला. आपल्या सज्जातील विविध गावांमध्ये प्रत्यक्ष भेटी देऊन महिला शेतकऱ्यांशी संवाद साधण्यात आला. अधिनियमाचे महत्त्व, अर्ज भरण्याची प्रक्रिया, आवश्यक कागदपत्रे आणि महिला शेतकरी प्रमाणपत्राचे महत्त्व याबाबत महिलांना सविस्तर मार्गदर्शन करण्यात आले.

१३ गावांमध्ये जनजागृती; ६६४ महिलांचे अर्ज!

महिला शेतकऱ्यांना शासकीय प्रक्रियेत सहभागी करून घेण्यासाठी राबविण्यात आलेल्या या उपक्रमाला गावोगावी प्रतिसाद मिळाला. विविध गावांमध्ये नोंदविण्यात आलेल्या अर्जांची संख्या पुढीलप्रमाणे आहे.

अड्याळ : २१ अर्ज

आंबोली : ६५ अर्ज

किस्टापूर : ६७ अर्ज

प्रियदर्शनी : ६७ अर्ज

वायगाव : ४२ अर्ज

येनापूर : ४० अर्ज

सगणापूर : १६३ अर्ज

कन्नडगाव : ५६ अर्ज

दुर्गापूर : ५१ अर्ज

चांदेश्वर : ४६ अर्ज

धर्मपूर : ४६ अर्ज

सोमनपल्ली :४८

चित्तरंजनपुर :२२

ग्रामसभेच्या मंजुरीनंतर मिळणार नवी ओळख!

महिला शेतकऱ्यांचे अर्ज तयार करण्याची प्रक्रिया पूर्ण झाल्यानंतर आता संबंधित अर्जांना ग्रामसभेची मंजुरी मिळण्याची पुढील प्रक्रिया अपेक्षित आहे. आवश्यक पडताळणी आणि लागू नियमांनुसार प्रक्रिया पूर्ण झाल्यानंतर पात्र महिला शेतकऱ्यांना स्वतंत्र ओळख मिळण्याचा मार्ग मोकळा होणार आहे.

शेतीच्या कामात महिलांचे योगदान अनन्यसाधारण आहे. पेरणी, निंदणी, आंतरमशागत, कापणी, धान्याची साठवणूक आणि पशुपालन अशा शेतीशी निगडित अनेक कामांमध्ये महिला महत्त्वाची भूमिका बजावतात. मात्र, प्रत्यक्ष शेतात कष्ट करणाऱ्या अनेक महिलांची स्वतंत्र शेतकरी म्हणून अधिकृत नोंद नसल्याने त्यांचे योगदान अनेकदा दुर्लक्षित राहते.

हीच परिस्थिती बदलण्यासाठी महिला शेतकऱ्यांना त्यांच्या हक्कांची जाणीव करून देणे, आवश्यक कागदपत्रांची माहिती देणे आणि शासकीय प्रक्रियेत सहभागी होण्यासाठी मदत करणे, हा या मोहिमेचा प्रमुख उद्देश आहे.

कागदपत्रांपासून अर्जापर्यंत मार्गदर्शन!

ग्रामीण भागातील अनेक महिलांना शासकीय योजनांची माहिती असली, तरी अर्ज भरणे, आवश्यक कागदपत्रे जोडणे आणि नोंदणी प्रक्रिया पूर्ण करणे यामध्ये अडचणी येतात. या अडचणी दूर करण्यासाठी कृषी विभागाच्या कर्मचाऱ्यांनी प्रत्यक्ष गावात जाऊन महिलांना मार्गदर्शन केले.

महिला शेतकरी प्रमाणपत्राच्या माध्यमातून कृषीविषयक विविध योजना, प्रशिक्षण आणि सुविधांपर्यंत पोहोचण्याच्या संधींबाबतही माहिती देण्यात आली. संबंधित योजनांचा लाभ मिळविण्यासाठी प्रत्येक योजनेचे स्वतंत्र पात्रता निकष लागू राहतील.

महिला सक्षमीकरणाचा नवरात्रीतून जागर!

नवरात्रीमध्ये देवीच्या विविध रूपांची पूजा केली जाते. मात्र, खऱ्या अर्थाने स्त्रीशक्तीचा सन्मान करायचा असेल, तर कष्टकरी महिलांना त्यांच्या कार्याची ओळख, सन्मान आणि विकासाच्या संधी मिळणे आवश्यक आहे. याच विचारातून महिला शेतकऱ्यांच्या सक्षमीकरणासाठी राबविण्यात आलेली ही मोहीम महत्त्वपूर्ण ठरत आहे.

महिला शेतकरी सक्षम झाली, तर कुटुंब सक्षम होईल; कुटुंब सक्षम झाले, तर गावाची आणि ग्रामीण अर्थव्यवस्थेची प्रगती अधिक वेगाने होईल! या भावनेतून सहाय्यक कृषी अधिकारी प्रदीप मुंडे, समूह सहाय्यक नयन कुमरे आणि तुषार महाकाळकर यांनी गावोगावी जनजागृती व अर्ज नोंदणीसाठी पुढाकार घेतला.

नवरात्रीच्या पावन पर्वात सुरू झालेली ही मोहीम महिला शेतकऱ्यांच्या आत्मसन्मानाला बळ देणारी ठरत असून, ग्रामसभेच्या मंजुरीनंतर पात्र महिलांना स्वतंत्र ओळख मिळण्याच्या प्रक्रियेकडे आता सर्वांचे लक्ष लागले आहे.