भाजपा नेते केशव भांडेकर यांच्या निधनाने राजकीय वर्तुळात शोककळा!

माजी आमदार डॉ. देवराव होळी यांची वालसरा येथे अंत्यविधीस उपस्थिती; भांडेकर परिवाराचे केले सांत्वन

चामोर्शी: चामोर्शी पंचायत समितीचे माजी उपसभापती तथा भाजपा नेते केशव भांडेकर यांच्या निधनाने चामोर्शी तालुक्यासह परिसरात शोककळा पसरली आहे. त्यांच्या निधनाने भाजपाने एक निष्ठावान कार्यकर्ता आणि अनुभवी नेतृत्व गमावल्याची भावना व्यक्त होत असताना, त्यांच्या स्वगावी वालसरा येथे पार पडलेल्या अंत्यविधीस भाजपा आदिवासी मोर्चाचे प्रदेशाध्यक्ष तथा गडचिरोलीचे माजी आमदार डॉ. देवराव होळी यांनी उपस्थित राहून भावपूर्ण श्रद्धांजली अर्पण केली.

यावेळी डॉ. देवराव होळी यांनी दिवंगत केशवजी भांडेकर यांच्या पार्थिवाचे अंत्यदर्शन घेतले. तसेच भांडेकर परिवाराची भेट घेऊन शोकसंवेदना व्यक्त केल्या. या दुःखद प्रसंगी कुटुंबीयांना धीर देत त्यांनी भांडेकर परिवाराचे सांत्वन केले.

केशवजी भांडेकर यांनी राजकीय व सामाजिक क्षेत्रात केलेल्या कार्याच्या आठवणींना यावेळी उजाळा देण्यात आला. पक्षासाठी निष्ठेने कार्य करणारे नेतृत्व म्हणून त्यांची ओळख होती. त्यांच्या निधनामुळे पक्षाचे मोठे नुकसान झाल्याची भावना डॉ. देवराव होळी यांनी व्यक्त केली. तसेच शोकाकुल कुटुंबीयांना या दुःखातून सावरण्याचे बळ मिळावे, अशी प्रार्थनाही त्यांनी केली.

भाजपा पदाधिकाऱ्यांची उपस्थिती

या अंत्यविधीप्रसंगी भाजपा जिल्हाध्यक्ष प्रा. रमेश बारसागडे, युवा मोर्चाचे जिल्हाध्यक्ष मधुकर भांडेकर यांच्यासह भाजपाचे विविध पदाधिकारी, कार्यकर्ते आणि परिसरातील नागरिक उपस्थित होते. उपस्थित सर्वांनी दिवंगत केशवजी भांडेकर यांना भावपूर्ण श्रद्धांजली अर्पण करून भांडेकर परिवाराप्रती संवेदना व्यक्त केल्या.

केशवजी भांडेकर यांच्या निधनाने निर्माण झालेली पोकळी भरून काढणे कठीण असल्याची भावना व्यक्त करत उपस्थितांनी त्यांच्या स्मृतींना अभिवादन केले.