बससेवेच्या अनियमिततेविरोधात विद्यार्थ्यांचा चक्का जाम! चामोर्शी बसस्थानकावर अर्धा तास रास्ता रोको; पोलीस निरीक्षक ढाकणे यांच्या मध्यस्थीने आंदोलनाची सांगता

जिल्हा प्रतिनिधी|नितेश गट्टीवार 

गडचिरोली /चामोर्शी,दि १ सप्टेंबर : गणपूर-जयरामपूर मार्गावरील एसटी बससेवा वारंवार अनियमित होत असल्याने संतप्त झालेल्या विद्यार्थ्यांनी मंगळवार, १ सप्टेंबर रोजी चामोर्शी बसस्थानकावर चक्का जाम आंदोलन केले. निर्धारित वेळेत बस उपलब्ध होत नसल्याने विद्यार्थ्यांची मोठी गैरसोय होत असून, या प्रश्नाकडे एसटी प्रशासनाचे लक्ष वेधण्यासाठी विद्यार्थ्यांनी सुमारे अर्धा तास रास्ता रोको केला.

गणपूर, जयरामपूर व परिसरातील विद्यार्थी दररोज शिक्षणासाठी चामोर्शी येथे येतात. अनेक विद्यार्थी सकाळी ६ वाजताच शाळेत पोहोचतात. मात्र शाळा सुटल्यानंतर घरी परतण्यासाठी अपेक्षित असलेली साडेबारा वाजताची बस वेळेवर उपलब्ध होत नसल्याने विद्यार्थ्यांना बसस्थानकावर ताटकळत थांबावे लागत असल्याची तक्रार आहे. त्यातच दुपारी दोन वाजताची बसदेखील नियमितपणे सोडली जात नसल्याने विद्यार्थ्यांमध्ये संतापाचे वातावरण निर्माण झाले होते.

“सकाळी उपाशीपोटी ६ वाजता शाळेत येतो; मात्र घरी जाण्यासाठी बस वेळेवर मिळत नाही. बस वेळेवर येत नाही, विद्यार्थ्यांना घेतले जात नाही, मग आम्ही काय करायचे?” असा संतप्त सवाल विद्यार्थ्यांनी उपस्थित केला.

बससेवेच्या या अनियमिततेमुळे अखेर विद्यार्थ्यांनी बसस्थानक परिसरात एकत्र येत रास्ता रोको केला. आंदोलनामुळे काही काळ वाहतुकीवर परिणाम झाला. विद्यार्थ्यांचा आक्रमक पवित्रा पाहता प्रशासनाचे लक्ष या प्रश्नाकडे वेधले गेले.

दरम्यान, आंदोलनाची माहिती मिळताच चामोर्शी पोलीस निरीक्षक ढाकणे यांनी परिस्थितीचे गांभीर्य ओळखून अधिकारी व कर्मचाऱ्यांसह तातडीने घटनास्थळी धाव घेतली. त्यांनी विद्यार्थ्यांशी संवाद साधून त्यांच्या समस्या जाणून घेतल्या तसेच आंदोलन शांततेत सोडविण्यासाठी मध्यस्थी केली.

पोलिसांनी तातडीने संबंधित यंत्रणेशी समन्वय साधत विद्यार्थ्यांसाठी बस उपलब्ध करून दिली. बस उपलब्ध झाल्यानंतर विद्यार्थ्यांची गैरसोय दूर झाली आणि समाधान व्यक्त करत त्यांनी रास्ता रोको आंदोलन मागे घेतले. पोलिसांच्या तत्पर हस्तक्षेपामुळे परिस्थिती नियंत्रणात आली आणि आंदोलन शांततेत संपले.

विद्यार्थ्यांची मागणी : बसफेऱ्या वेळेवर सुरू करा!

ग्रामीण भागातील विद्यार्थ्यांसाठी एसटी बस ही शिक्षणाची जीवनवाहिनी आहे. बससेवा अनियमित झाल्यास त्याचा थेट परिणाम विद्यार्थ्यांच्या शाळेतील उपस्थितीवर आणि शिक्षणावर होतो. त्यामुळे गणपूर-जयरामपूर मार्गावरील बसफेऱ्या निर्धारित वेळेनुसार नियमित सुरू ठेवाव्यात, विद्यार्थ्यांना बसमध्ये प्राधान्याने प्रवासाची सुविधा मिळावी आणि बसफेऱ्या अचानक रद्द होणार नाहीत याची दक्षता घ्यावी, अशी जोरदार मागणी विद्यार्थ्यांनी केली आहे.

पोलिसांच्या तातडीच्या मध्यस्थीमुळे आजचा प्रश्न तूर्तास मार्गी लागला असला तरी एसटी प्रशासनाने कायमस्वरूपी तोडगा काढून बससेवा नियमित न केल्यास पुन्हा आंदोलनाचा मार्ग स्वीकारावा लागू शकतो, अशी भूमिका विद्यार्थ्यांकडून व्यक्त होत आहे. त्यामुळे आता एसटी प्रशासन या गंभीर प्रश्नाकडे किती गांभीर्याने पाहते, याकडे विद्यार्थी व पालकांचे लक्ष लागले आहे.