विदर्भाची स्वरकोकिळा करुणाताई कोसेकर

सोनू वाळके,गडचिरोली जिल्हाप्रतिनिधी.

गडचिरोली:
गडचिरोली जिल्ह्याच्या मातीतून घडलेली आणि आज संपूर्ण महाराष्ट्रात आपली स्वरकला दुमदुमवणारी सौ. करुणाताई कोसेकर या खऱ्या अर्थाने स्वरकोकिळा ठरल्या आहेत. करुणाताईंची खासियत म्हणजे त्या एकाच गाण्यात स्त्रीचा कोमल आवाज आणि पुरुषाचा गंभीर स्वर अशा दोन्ही रंगात गायन सादर करू शकतात. एवढेच नव्हे तर त्या दोन वेगवेगळ्या प्रकारच्या स्वरभेदांत गातात. म्हणजेच त्यांच्या कंठातून एकूण चार आवाजांचे दर्शन रसिकांना घडते आणि ही विलक्षण कला ऐकून सर्व श्रोते अक्षरशः थक्क होतात. जगात अनेक पुरुषांनी स्त्रीच्या आवाजात गाण्याचे उदाहरण आपण पाहिले आहे, परंतु एक स्त्री असूनही पुरुषांचा स्वर जसा आहे तसाच हुबेहुब सादर करण्याची अनोखी कला करुणाताईंनी रसिकांसमोर दाखवून दिली आहे. ही कला त्यांच्या आवाजातून उमटली आणि महाराष्ट्रातील रसिकांनी त्यांना उचलून धरले.

लहानपणापासूनच करुणा ताईंना संगीताची ओढ होती. त्यांचे वडील  श्री. पुंडलिकराव पिंपळे व भाऊ श्री. भास्कर पिंपळे हे स्वतः संगीतकार असल्यामुळे लहानशा वयातच करुणाताईंना घरातूनच संगीताचे संस्कार मिळाले. तबला, पेटी आणि गायनाचे धडे त्यांनी वडील व भावाकडून घेतले. संगीताच्या वाटेवर त्यांनी हेच गुरु मानले आणि त्यांच्याच मार्गदर्शनाखाली स्वतःचे स्वरविश्व घडवले. आज त्यांची प्रतिभा फुलून आली आहे आणि ती महाराष्ट्रभर सुगंध पसरवत आहे.

करुणाताईंची गायकी अवघ्या  दोन महिन्यांतच महाराष्ट्रभर गाजली आहे. नागपूर येथे झालेल्या कार्यक्रमात त्यांना “समाजभूषण पुरस्कार प्रदान” करण्यात आला, तर पवनी येथे त्यांना  उत्कृष्ट गायन पुरस्कार मिळाला. याशिवाय विविध ठिकाणी झालेल्या सत्कारांनी आणि पुष्पगुच्छ सन्मानांनी त्यांच्या लोकप्रियतेचा ठसा उमटवला आहे. अल्पावधीतच एवढा लौकिक मिळवणे ही त्यांची खरी ताकद आहे आणि त्यांच्या स्वरजादूची ही खरी पावती आहे.

आज करुणाताई केवळ गडचिरोली जिल्ह्याचाच नव्हे तर संपूर्ण महाराष्ट्राचा अभिमान ठरल्या आहेत. त्यांच्या कंठातून घुमणारे स्वर लोकांच्या मनात घर करून बसले आहेत. गायनाच्या दुनियेत स्वतःची वेगळी ओळख निर्माण करून त्या रसिकांच्या मनावर राज्य करत आहेत. त्यांच्या स्वरातील जादूने सर्वसामान्य लोकांना तेवढाच आनंद दिला आहे जितका संगीत जाणकारांना सुखावून सोडला आहे.

करुणाताईंचं जीवन आणि त्यांची मेहनत हे नवोदित कलाकारांसाठी प्रेरणादायी आहे. त्यांनी दाखवून दिलं आहे की संगीताची खरी ओढ आणि जिद्द असेल तर कोणतंही स्वप्न अशक्य नाही. त्या म्हणतातच — “गायनात जिद्द असेल तर अशक्य काहीच नाही.”

आज करुणाताई कोसेकर हे नाव संपूर्ण महाराष्ट्रात संगीताच्या क्षेत्रात घुमत आहे. त्यांच्या आवाजाची ही विलक्षण देणगी लोकांना केवळ आनंदच देत नाही तर आश्चर्यचकितही करते. स्वरांमधून त्यांनी उंचावलेला मान हा गडचिरोलीच्या भूमीचा अभिमान आहे आणि तो अभिमान महाराष्ट्राच्या प्रत्येक कानाकोपऱ्यात पोहोचत आहे.