गडचिरोली जिल्ह्यातील सर्व १२ तालुके दुष्काळग्रस्त घोषित करा!

शेतकऱ्यांना तातडीने आर्थिक मदत व सवलती द्या; राष्ट्रवादी काँग्रेसची जिल्हाधिकाऱ्यांकडे जोरदार मागणी

जिल्हा प्रतिनिधी|गडचिरोली : यंदाच्या खरीप हंगामात पावसाच्या अनियमिततेमुळे आणि अपेक्षित पाऊस न झाल्याने गडचिरोली जिल्ह्यातील शेतकरी आर्थिक संकटात सापडले आहेत.

भातपिकांसह इतर खरीप पिकांच्या वाढीवर प्रतिकूल परिणाम होण्याची शक्यता निर्माण झाल्याने शेतकऱ्यांच्या चिंतेत भर पडली आहे. या पार्श्वभूमीवर गडचिरोली जिल्ह्यातील सर्व १२ तालुक्यांची प्रत्यक्ष पाहणी करून संपूर्ण जिल्हा दुष्काळग्रस्त घोषित करावा आणि शेतकऱ्यांना तातडीने आर्थिक मदत व शासकीय सवलती द्याव्यात, अशी जोरदार मागणी राष्ट्रवादी काँग्रेस पक्षाच्या वतीने करण्यात आली आहे.

यासंदर्भात जिल्हाधिकाऱ्यांना निवेदन देऊन शेतकऱ्यांच्या समस्यांकडे तातडीने लक्ष वेधण्याची भूमिका पक्षाने घेतली आहे.

पाच-पाच तालुक्यांचा दौरा; 

पावसाच्या स्थितीचा आढावा

आमदार राजे डॉ.धर्मराव बाबा आत्राम यांनी अहेरी, मुलचेरा, एटापल्ली, सिरोंचा आणि भामरागड या पाच तालुक्यांचा दौरा करून तेथील पावसाच्या परिस्थितीचा आढावा घेतला. या भागांमध्येही अपेक्षेप्रमाणे पाऊस न झाल्याचे निदर्शनास आल्याचे निवेदनात नमूद करण्यात आले आहे.

राष्ट्रवादी काँग्रेसचे गडचिरोली जिल्हाध्यक्ष रवींद्र वासेकर यांनी आरमोरी, देसाईगंज (वडसा), धानोरा, कुरखेडा आणि कोरची या पाच तालुक्यांचा दौरा करून तेथील परिस्थितीची पाहणी केली. या भागांतही पावसाअभावी शेतीसमोर गंभीर संकट निर्माण झाल्याचे पक्षाने म्हटले आहे.

दोन तालुकांपुरता निर्णय नको; इतर तालुक्यांतील शेतकऱ्यांनाही न्याय द्या!

गडचिरोली आणि चामोर्शी या दोन तालुक्यांनाच दुष्काळग्रस्त घोषित केले असल्यास, उर्वरित तालुक्यांतील शेतकऱ्यांवर अन्याय होण्याची शक्यता असल्याचे राष्ट्रवादी काँग्रेसने निवेदनातून अधोरेखित केले आहे.

जिल्ह्यातील विविध भागांमध्ये पावसाची स्थिती, पिकांची वाढ, संभाव्य उत्पादनातील घट आणि शेतकऱ्यांच्या आर्थिक अडचणी यांचा सखोल अभ्यास करून वस्तुस्थितीच्या आधारे निर्णय घेण्याची गरज व्यक्त करण्यात आली आहे. केवळ तालुकानिहाय घोषणांपुरता निर्णय मर्यादित न ठेवता प्रत्यक्ष शेतातील परिस्थिती तपासून बाधित शेतकऱ्यांना न्याय द्यावा, अशी भूमिका पक्षाने मांडली आहे.

शेतकऱ्यांसाठी सहा प्रमुख मागण्या

राष्ट्रवादी काँग्रेस पक्षाने जिल्हाधिकाऱ्यांकडे पुढील मागण्या केल्या आहेत.

सर्व १२ तालुक्यांत तातडीने सर्वेक्षण:

पावसाची स्थिती आणि पीक नुकसानीची प्रत्यक्ष पाहणी करून सर्वंकष अहवाल तयार करावा.पात्र भाग दुष्काळग्रस्त घोषित करा, शासनाच्या निकषांनुसार दुष्काळी परिस्थितीचे मूल्यांकन करून पात्र तालुक्यांना दुष्काळग्रस्त घोषित करावे.

आर्थिक मदत व नुकसानभरपाई द्या: 

बाधित शेतकऱ्यांना तातडीने आर्थिक मदत आणि नियमानुसार पीक नुकसानभरपाई उपलब्ध करून द्यावी, कृषी कर्जाबाबत सवलती द्या, आर्थिक संकटात सापडलेल्या शेतकऱ्यांना शासनाच्या नियमानुसार कर्जविषयक सवलती व आवश्यक मदत द्यावी.पीकविम्याची भरपाई मिळवून द्या, पात्र शेतकऱ्यांना पीकविमा योजनेअंतर्गत नुकसानभरपाई मिळण्यासाठी संबंधित यंत्रणांना तातडीने निर्देश द्यावेत.शेतमजुरांनाही दिलासा द्या, दुष्काळी परिस्थितीमुळे प्रभावित झालेल्या ग्रामीण कुटुंबांना आवश्यक मदत आणि रोजगाराच्या संधी उपलब्ध करून द्याव्यात.

खरीप हंगामावरच शेतकऱ्यांचे आर्थिक गणित!

गडचिरोली जिल्ह्यातील बहुतांश ग्रामीण कुटुंबांचा उदरनिर्वाह शेतीवर अवलंबून आहे. खरीप हंगामातील पीक चांगले आले तरच शेतकऱ्यांना वर्षभराच्या खर्चाचे नियोजन करता येते. मात्र, पावसाअभावी पिकांचे नुकसान झाल्यास शेतीचा खर्च, कुटुंबाचा उदरनिर्वाह आणि कर्जफेड अशा अनेक समस्यांना शेतकऱ्यांना सामोरे जावे लागते.

त्यामुळे शासनाने या परिस्थितीकडे गांभीर्याने पाहून तातडीने सर्वेक्षण करावे आणि पात्र शेतकऱ्यांना मदत मिळण्यासाठी आवश्यक कार्यवाही करावी, अशी मागणी करण्यात आली आहे.

शासनाने तातडीने दखल घेण्याची अपेक्षा

गडचिरोली जिल्ह्यातील सर्व १२ तालुक्यांतील पावसाची व पीक नुकसानीची वस्तुस्थिती लक्षात घेऊन दुष्काळग्रस्त घोषित करण्याच्या मागणीचा सहानुभूतीपूर्वक विचार करावा. शेतकऱ्यांना आर्थिक संकटातून बाहेर काढण्यासाठी शासनाने विलंब न करता ठोस पावले उचलावीत, असे आवाहन राष्ट्रवादी काँग्रेस पक्षाच्या वतीने करण्यात आले आहे.

शेतकऱ्यांच्या संकटाकडे दुर्लक्ष न करता प्रत्यक्ष परिस्थितीच्या आधारे निर्णय घ्यावा आणि त्यांना तातडीने दिलासा द्यावा, हीच या निवेदनामागील प्रमुख भूमिका आहे.