आसा-कवठाराम रस्त्याच्या कामात गैरव्यवहाराचा आरोप; दोन वर्षांपासून मजुरांची मजुरी थकीत!

कंत्राटदारावर कारवाईची मागणी; काँग्रेस नेते डॉ. अजय कंकडालवार यांचे जिल्हाधिकारी, पोलीस अधीक्षकांना निवेदन

जिल्हा प्रतिनिधी गडचिरोली :अहेरी तालुक्यातील आसा, नैनेर, कपेवंचा आणि कवठाराम या अतिदुर्गम व आदिवासीबहुल गावांना जोडणाऱ्या महत्त्वाच्या रस्त्याचे काम मागील दोन वर्षांपासून रखडले असून, या कामावर राबलेल्या शेकडो आदिवासी मजुरांसह ट्रॅक्टरधारकांची लाखो रुपयांची मजुरी थकीत असल्याचा आरोप करण्यात आला आहे. रस्त्याच्या बांधकामात अनियमितता व गैरव्यवहार झाल्याचा आरोप करत या संपूर्ण प्रकरणाची सखोल चौकशी करून संबंधित कंत्राटदारावर कठोर कारवाई करावी, अशी मागणी काँग्रेस नेते तथा गडचिरोली जिल्हा परिषदेचे माजी अध्यक्ष डॉ. अजय कंकडालवार यांनी केली आहे.

यासंदर्भात डॉ. कंकडालवार यांनी गडचिरोली येथे जिल्हाधिकारी व जिल्हा पोलीस अधीक्षकांची भेट घेऊन सविस्तर चर्चा केली आणि त्यांना निवेदन सादर केले.

दोन वर्षांपासून रस्ता अर्धवट

डॉ. कंकडालवार यांच्या निवेदनानुसार, आसा ते कवठाराम हा मार्ग या भागातील नागरिकांच्या दळणवळणाचा महत्त्वाचा दुवा आहे. अनेक वर्षांच्या मागणीनंतर सार्वजनिक बांधकाम विभाग, उपविभाग आलापल्ली यांच्या माध्यमातून या रस्त्याचे काम मंजूर करण्यात आले. मात्र, काम सुरू झाल्यानंतर केवळ माती व मुरूम टाकून रस्ता तयार केल्याचे दाखवण्यात आले आणि त्यानंतर काम अर्धवटच राहिल्याचा आरोप करण्यात आला आहे.

या कामासाठी आसा, नैनेर, कपेवंचा आणि कवठाराम परिसरातील सुमारे २० ते २५ ट्रॅक्टरधारकांनी अनेक महिने आपली वाहने कामासाठी लावली. तसेच शेकडो आदिवासी मजुरांनी कडक उन्हात आणि पावसात काम केले. मात्र, दोन वर्षांचा कालावधी उलटूनही संबंधितांना त्यांच्या कामाचा मोबदला मिळालेला नसल्याचा दावा निवेदनातून करण्यात आला आहे.

मजुरीसाठी मजुरांची फरफट

कामाचा मोबदला मिळावा म्हणून मजूर व ट्रॅक्टरधारक संबंधित कंत्राटदाराकडे वारंवार पाठपुरावा करीत आहेत. मात्र, त्यांना केवळ आश्वासने मिळत असल्याचे निवेदनात नमूद करण्यात आले आहे. त्यामुळे कष्टकरी मजुरांमध्ये नाराजी निर्माण झाली असून, त्यांच्या थकीत मजुरीचा प्रश्न तातडीने सोडविण्याची मागणी करण्यात आली आहे.

दुसरीकडे रस्त्याचे काम अपूर्ण असल्याने पावसाळ्यात या चारही गावांचा संपर्क प्रभावित होतो. शाळकरी विद्यार्थी, गर्भवती महिला तसेच गंभीर आजारी रुग्णांना ये-जा करताना मोठ्या अडचणींचा सामना करावा लागत असल्याचेही निवेदनात म्हटले आहे.

डॉ. कंकडालवार यांच्या प्रमुख मागण्या

डॉ. अजय कंकडालवार यांनी प्रशासनाकडे खालील मागण्या केल्या आहेत—

आसा–नैनेर–कपेवंचा–कवठाराम मार्गाचे रखडलेले काम तातडीने सुरू करून रस्त्याचे कायमस्वरूपी डांबरीकरण करावे.

दोन वर्षांपासून थकीत असलेली मजुरांची व ट्रॅक्टरधारकांची मजुरी संबंधितांकडून वसूल करून तातडीने अदा करावी.

रस्त्याच्या कामातील कथित गैरव्यवहार, कामाचा दर्जा आणि मजुरांच्या थकीत मजुरीची सखोल चौकशी करावी.

चौकशीत दोष आढळल्यास संबंधित कंत्राटदारावर नियमानुसार कठोर कारवाई करून त्याला काळ्या यादीत टाकण्याची प्रक्रिया करावी.

आंदोलनाचा इशारा

दरम्यान, संबंधित कंत्राटदारावर कारवाई करून मजुरांना त्यांची थकीत मजुरी मिळाली नाही आणि रस्त्याचे काम तातडीने सुरू झाले नाही, तर पीडित नागरिक, ट्रॅक्टरधारक व काँग्रेस कार्यकर्त्यांसह जिल्हाधिकारी कार्यालयासमोर तीव्र आंदोलन छेडण्यात येईल, तसेच आमरण उपोषणाचा इशारा डॉ. कंकडालवार यांनी दिला आहे. याची सर्वस्वी जबाबदारी प्रशासनाची राहील, असेही त्यांनी निवेदनात नमूद केले आहे.

आता प्रशासन या तक्रारीची दखल घेऊन रस्त्याच्या कामाची प्रत्यक्ष पाहणी, कंत्राटी कामाची चौकशी आणि मजुरांच्या थकीत मजुरीबाबत काय निर्णय घेते, याकडे आसा, नैनेर, कपेवंचा आणि कवठाराम परिसरातील नागरिकांचे लक्ष लागले आहे.