मार्कंडेश्वर मंदिरात भाविकांची मांदियाळी; नागपंचमी व श्रावण सोमवारनिमित्त भक्तिसागर

मार्कंडा देव येथे भक्तिमय वातावरण; दर्शनासाठी भाविकांची मोठी गर्दी

नितेश गट्टीवार |जिल्हा प्रतिनिधी 

गडचिरोली/चामोर्शी, दि. १७ ऑगस्ट : चामोर्शी तालुक्यातील ऐतिहासिक, पौराणिक आणि धार्मिक महत्त्व लाभलेल्या मार्कंडा देव येथील श्री मार्कंडेश्वर मंदिरात आज नागपंचमी आणि पहिल्या श्रावण सोमवारनिमित्त भाविकांचा अक्षरशः जनसागर उसळला. पहाटेपासूनच मंदिर परिसरात भाविकांची मोठी रेलचेल सुरू झाली होती. भगवान मार्कंडेश्वराच्या दर्शनासाठी चामोर्शीसह गडचिरोली जिल्ह्यातील विविध भागांतून तसेच दूरवरच्या गावांतून भाविक मोठ्या संख्येने दाखल झाले.

नागपंचमी आणि श्रावण सोमवार असा दुहेरी धार्मिक योग आल्याने मार्कंडा देव परिसराला विशेष महत्त्व प्राप्त झाले होते. 

पहाटेपासून भाविकांनी मंदिरात गर्दी करत भगवान मार्कंडेश्वराचे दर्शन घेतले. अनेक भाविकांनी शिवलिंगावर जलाभिषेक, दुग्धाभिषेक करून बेलपत्र, फुले अर्पण केली. पूजाअर्चा, अभिषेक आणि विविध धार्मिक विधींमुळे मंदिर परिसरात दिवसभर भक्तिमय वातावरण अनुभवायला मिळाले.

मंदिर परिसरात घुमणारा ‘हर हर महादेव’, ‘ॐ नमः शिवाय’ चा जयघोष, घंटानाद आणि भक्तीगीतांमुळे संपूर्ण परिसर शिवमय झाला होता. श्रद्धेने दर्शनासाठी रांगेत उभे असलेले महिला-पुरुष, ज्येष्ठ नागरिक तसेच लहान मुलांमध्येही मोठा उत्साह दिसून आला.

श्रावण महिन्यात भगवान शंकराच्या दर्शनाला विशेष धार्मिक महत्त्व असल्याने पहिल्या श्रावण सोमवारच्या निमित्ताने भाविकांनी मोठ्या श्रद्धेने मंदिरात हजेरी लावली. नागपंचमीच्या पार्श्वभूमीवरही भाविकांमध्ये उत्साहाचे वातावरण होते. पहाटेपासून वाढत गेलेली गर्दी दुपारपर्यंत कायम होती.

भाविकांची वाढती गर्दी लक्षात घेऊन मंदिर परिसरात दर्शनासाठी रांगा, भाविकांच्या ये-जा करण्याची व्यवस्था आणि परिसरातील नियोजन करण्यात आले होते. गर्दी असूनही भाविकांनी शिस्तबद्ध पद्धतीने दर्शन घेत धार्मिक वातावरणात सहभाग नोंदविला.

मार्कंडेश्वर मंदिराच्या पौराणिक महत्त्वामुळे श्रावण महिन्यात येथे दरवर्षी मोठ्या संख्येने भाविक येतात. यंदाही पहिल्याच श्रावण सोमवारी भाविकांनी मोठी गर्दी केल्याने मार्कंडा देव परिसराला जणू यात्रेचे स्वरूप प्राप्त झाले होते. श्रद्धा, भक्ती आणि ‘हर हर महादेव’च्या जयघोषाने संपूर्ण परिसर दुमदुमून गेला.

नागपंचमी आणि पहिल्या श्रावण सोमवारचा हा पवित्र संगम भाविकांसाठी श्रद्धेचा आणि भक्तीचा अविस्मरणीय सोहळा ठरला.