अवैध रेती उत्खनन प्रकरणी मंडळ अधिकारी व तलाठी निलंबित, तहसीलदारांच्या निलंबनाचा प्रस्ताव शासनाकडे!

कोंढाळा-सिंड्राई घाटातील ट्रॅक्टर अपघातानंतर जिल्हाधिकारी अविश्यांत पंडा यांची धडक कारवाई

प्रतिनिधी | न्यूज जागर

गडचिरोली, २७ जून :देसाईगंज तालुक्यातील मौजा कोंढाळा येथील कोंढाळा-सिंड्राई घाट, वैणगंगा नदी परिसरात अवैध रेती वाहतूक करणाऱ्या ट्रॅक्टरचा भीषण अपघात होऊन एका मजुराचा मृत्यू झाल्याची घटना घडली होती. या प्रकरणाची अत्यंत गंभीर दखल घेत गडचिरोलीचे जिल्हाधिकारी अविश्यांत पंडा यांनी महसूल विभागातील दोषी अधिकाऱ्यांवर कठोर प्रशासकीय कारवाईचा बडगा उगारला आहे. याप्रकरणी संबंधित क्षेत्रातील मंडळ अधिकारी आणि तलाठी यांना तात्काळ निलंबित करण्यात आले असून, देसाईगंजच्या तहसीलदारांच्या निलंबनाचा प्रस्ताव विभागीय आयुक्तांकडे पाठवण्यात आला आहे.

नेमकी घटना काय होती?

काही दिवसांपूर्वी मौजा कोंढाळा येथील कोंढाळा-सिंड्राई घाट परिसरात विलास महादेव ढकले (वय अंदाजे ३६ वर्ष, रा. जिल्हेवाडा, ता. देसाईगंज) हे ट्रॅक्टरद्वारे रेतीची अवैध वाहतूक करत असताना ट्रॅक्टर उलटला. या अपघातात ट्रॅक्टरखाली चिरडून विलास ढकले यांचा जागीच मृत्यू झाला होता. या घटनेमुळे जिल्ह्यात एकच खळबळ उडाली होती.

चौकशीत महसूल यंत्रणेचा बेजबाबदारपणा उघड

अपघाताच्या घटनेनंतर जिल्हाधिकाऱ्यांनी तात्काळ ‘जिल्हा भरारी पथका’ची नियुक्ती करून घटनास्थळाची सखोल चौकशी करण्याचे आदेश दिले होते. जिल्हा भरारी पथकाचा पाहणी अहवाल आणि उपविभागीय अधिकारी (SDO), देसाईगंज यांनी सादर केलेल्या अहवालातून धक्कादायक बाबी समोर आल्या:

बंदी असतानाही उत्खनन: शासनाच्या नियमांनुसार १० जून २०२६ नंतर संबंधित रेतीघाटावरील सर्व प्रकारचे उत्खनन बंद करण्याचे स्पष्ट निर्देश होते. तरीही या ठिकाणी सर्रासपणे अवैध रेती उत्खनन आणि वाहतूक सुरू होती.

यंत्रणेचे दुर्लक्ष: स्थानिक महसूल यंत्रणेने या अवैध प्रकारांवर प्रभावी नियंत्रण ठेवण्यासाठी कोणतीही अपेक्षित दक्षता किंवा कारवाई केली नाही, असे चौकशीत स्पष्ट झाले.

या अधिकाऱ्यांवर झाली कारवाई:

चौकशी अहवालात जबाबदारी निश्चित झाल्यानंतर जिल्हाधिकाऱ्यांनी तात्काळ खालील कारवाई केली आहे:

१. श्रीमती अर्चना टिस्कुले (मंडळ अधिकारी): कर्तव्यात कसूर केल्यामुळे तात्काळ निलंबित.

२. श्री. महादास ठाकरे (तलाठी): अवैध उत्खननाकडे दुर्लक्ष केल्याप्रकरणी तात्काळ निलंबित.

३. श्रीमती प्रिती डुढलकर (तहसीलदार, देसाईगंज): तालुक्याचे प्रमुख म्हणून प्रशासकीय जबाबदारी निश्चित करत, त्यांच्या निलंबनाचा प्रस्ताव विभागीय आयुक्त, नागपूर यांच्या माध्यमातून राज्य शासनाकडे मंजुरीसाठी पाठवण्यात आला आहे.

“कोणाचीही गय केली जाणार नाही!” – जिल्हाधिकारी

“अवैध रेती उत्खनन आणि वाहतुकीच्या बाबतीत जिल्हा प्रशासन शून्य सहनशीलता (Zero Tolerance) चे धोरण राबवत आहे. अशा बेकायदेशीर प्रकारांना पाठीशी घालणाऱ्या किंवा नियंत्रण ठेवण्यात हलगर्जीपणा करणाऱ्या कोणत्याही अधिकारी अथवा कर्मचाऱ्याची गय केली जाणार नाही. जिल्ह्यातील सर्व संबंधित यंत्रणांनी अवैध गौण खनिज उत्खननाविरोधात अधिक सतर्कतेने आणि कडकपणे काम करावे.”

– अविश्यांत पंडा, जिल्हाधिकारी, गडचिरोली.