रोगराई व खोडकिडीने धान पीक उद्ध्वस्त; चामोर्शी तालुक्यात राष्ट्रवादीचे पदाधिकारी थेट शेतकऱ्यांच्या बांधावर

नुकसानग्रस्त शेतीची पाहणी करून पंचनामे व तातडीच्या शासकीय मदतीची मागणी

नितेश गट्टीवार|जिल्हा प्रतिनिधी 

गडचिरोली (चामोर्शी) : चामोर्शी तालुक्यात यंदाच्या खरीप हंगामातील धान पिकावर रोगराई व खोडकिडीचा मोठ्या प्रमाणात प्रादुर्भाव झाल्याने शेतकरी आर्थिक संकटात सापडला आहे. अनेक ठिकाणी उभ्या धान पिकाचे मोठ्या प्रमाणात नुकसान झाले असून काही शेतकऱ्यांच्या संपूर्ण पिकाचेच नुकसान झाल्याची परिस्थिती निर्माण झाली आहे. या पार्श्वभूमीवर राष्ट्रवादी काँग्रेस पार्टीचे चामोर्शी तालुकाध्यक्ष कबीरदास आभारे पाटील यांनी नुकसानग्रस्त शेतशिवारात प्रत्यक्ष भेट देत पाहणी केली.

शेतकऱ्यांच्या बांधावर जाऊन पिकांची सद्यस्थिती जाणून घेताना रोगराई आणि खोडकिडीमुळे धानाच्या रोपांवर झालेला परिणाम, वाया गेलेले पीक आणि शेतकऱ्यांचे झालेले आर्थिक नुकसान याची माहिती घेण्यात आली. शेतकऱ्यांनी मोठ्या कष्टाने, वाढत्या उत्पादन खर्चाचा भार सहन करून पीक उभे केले; मात्र ऐन हंगामात रोगराई व किडीच्या प्रादुर्भावामुळे हातातोंडाशी आलेला घास हिरावला जात असल्याची व्यथा त्यांनी यावेळी मांडली.

गडचिरोली जिल्ह्यात शेती आणि विशेषतः धान उत्पादनाला मोठे महत्त्व आहे. त्यामुळे धान पिकाचे नुकसान म्हणजे ग्रामीण अर्थव्यवस्थेवर थेट परिणाम होण्याची शक्यता आहे.

“शेतकऱ्यांच्या नुकसानीकडे दुर्लक्ष नको”

यावेळी राष्ट्रवादी काँग्रेस पार्टीच्या पदाधिकाऱ्यांनी शासन व प्रशासनाने तातडीने नुकसानग्रस्त भागाची प्रत्यक्ष पाहणी करून शेतनिहाय पंचनामे करावेत, कृषी विभागामार्फत नुकसानीचे वस्तुनिष्ठ सर्वेक्षण करावे आणि पात्र शेतकऱ्यांना शासनाच्या नियमाप्रमाणे आर्थिक मदत मिळवून द्यावी, अशी मागणी केली.

तसेच रोगराई व खोडकिडीचा प्रादुर्भाव रोखण्यासाठी कृषी विभागाने शेतकऱ्यांना तातडीने मार्गदर्शन, आवश्यक उपाययोजना आणि तांत्रिक मदत उपलब्ध करून द्यावी, अशीही मागणी करण्यात आली.

राष्ट्रवादी काँग्रेस शेतकऱ्यांच्या पाठीशी

“शेतकऱ्यांच्या अडचणी केवळ कागदावर नोंदवून चालणार नाहीत. प्रशासनाने प्रत्यक्ष बांधावर जाऊन परिस्थिती पाहावी आणि नुकसानग्रस्त शेतकऱ्यांना दिलासा मिळेल, अशा पद्धतीने कार्यवाही करावी,” अशी भूमिका यावेळी तालुकाध्यक्ष कबीरदास आभारे पाटील यांनी मांडली.

शेतकऱ्यांच्या प्रश्नांना वाचा फोडण्यासाठी आणि नुकसानग्रस्तांना शासकीय मदत मिळवून देण्यासाठी राष्ट्रवादी काँग्रेस पार्टी आवश्यक त्या पातळीवर पाठपुरावा करणार असल्याचेही यावेळी सांगण्यात आले.

पाहणीवेळी उपस्थित यावेळी खेमदेव आभारे, ताताजी कोहपरे, गोविंदा आभारे, मुरलीधर आभारे, शेवकराम बोरकुटे, विठ्ठल भगत, गणेश हजारे, भयाजी आभारे, परशुराम मगर, धर्मा भोयर, देवाजी भोयर, मनोहर आभारे, रवींद्र भगत, सुदर्शन हजारे, अतुल भीरकुरवार, रवींद्र पाल, आकाश मगर, दशरथ पोटे, राजू पोटे, रेवनाथ आभारे, संदिप ठाकरे, पुंडलिक झाडे, टुमदेव आभारे, घनश्याम आभारे, तुळशीराम काटवले, लीगाजी जुनघरे, भयाजी बोरकुटे, रतिलाल आभारे यांच्यासह परिसरातील शेतकरी व नागरिक उपस्थित होते.

शेतकऱ्यांच्या पिकांचे झालेले नुकसान तातडीने नोंदवून शासनाकडून मदत मिळवून देण्यासाठी राष्ट्रवादी काँग्रेस पार्टीचा पाठपुरावा सुरू राहणार असल्याचा निर्धार यावेळी करण्यात आला.