भाग्यश्रीताई आत्राम यांच्या आंदोलनाला यश; मूलचेरातील खड्डे बुजविण्यास प्रशासनाची सुरुवात

मूलचेरा : तालुक्यातील खराब रस्ते आणि रस्त्यांवरील जीवघेण्या खड्ड्यांच्या प्रश्नाकडे प्रशासनाचे लक्ष वेधण्यासाठी करण्यात आलेल्या गणगर्जन ठिय्या आंदोलनाची अखेर दखल घेण्यात आली आहे. भाग्यश्रीताई आत्राम यांच्या नेतृत्वाखाली तसेच शाहीनताई हकीम यांच्या मार्गदर्शनाखाली ८ सप्टेंबर २०२६ रोजी मूलचेरा मुख्य चौकात आंदोलन करण्यात आले होते. या आंदोलनानंतर संबंधित विभागाकडून रस्त्यांवरील खड्डे बुजविण्याचे काम सुरू करण्यात आले असून, रस्त्यांच्या मंजुरी आणि टेंडर प्रक्रियेलाही गती देण्यात आल्याची माहिती आहे.

मूलचेरा तालुक्यातील विविध मार्गांची गेल्या काही काळापासून मोठ्या प्रमाणात दुरवस्था झाली आहे. रस्त्यांवर ठिकठिकाणी मोठमोठे खड्डे पडल्याने वाहनचालक, प्रवासी तसेच पादचाऱ्यांना मोठ्या अडचणींचा सामना करावा लागत होता. विशेषतः पावसाळ्यात खड्ड्यांमध्ये पाणी साचल्याने त्यांचा अंदाज येत नसल्यामुळे अपघाताचा धोका वाढला होता. खराब रस्त्यांमुळे वाहनांचे नुकसान होण्यासोबतच नागरिकांच्या दैनंदिन प्रवासावरही परिणाम होत होता.

या पार्श्वभूमीवर रस्त्यांना कायमस्वरूपी मंजुरी मिळेपर्यंत किमान रस्त्यांवरील खड्डे तातडीने बुजवावेत, अशी मागणी गणगर्जन आंदोलनाच्या माध्यमातून करण्यात आली होती. आंदोलनादरम्यान नागरिकांच्या दैनंदिन अडचणी, वाहनचालकांना होणारा त्रास आणि रस्त्यांच्या दुरवस्थेमुळे निर्माण होणाऱ्या संभाव्य अपघातांच्या प्रश्नाकडे प्रशासनाचे लक्ष वेधण्यात आले.

आंदोलनानंतर संबंधित विभागाकडून प्राथमिक स्वरूपात कार्यवाही सुरू झाली असून, रस्त्यांवरील खड्डे बुजविण्याचे काम प्रत्यक्षात सुरू झाले आहे. तसेच रस्त्यांच्या कायमस्वरूपी दुरुस्ती व बांधकामासाठी मंजुरीची प्रक्रिया आणि टेंडर प्रक्रिया सुरू असल्याचे सांगण्यात येत आहे. त्यामुळे आंदोलनाच्या माध्यमातून मांडण्यात आलेल्या मागण्यांना प्रशासनाकडून प्रतिसाद मिळत असल्याचे चित्र आहे.

दरम्यान, खड्डे बुजविण्याचे काम सुरू झाल्याने मूलचेरा तालुक्यातील नागरिकांमध्ये समाधान व्यक्त होत आहे. रस्त्यांच्या प्रश्नावर आवाज उठविल्याबद्दल भाग्यश्रीताई आत्राम आणि शाहीनताई हकीम यांचे नागरिकांकडून आभार मानण्यात येत आहेत. आंदोलनामुळे प्रशासनाचे लक्ष वेधले गेले आणि प्रलंबित असलेल्या रस्त्यांच्या प्रश्नाला गती मिळाल्याची भावना नागरिक व्यक्त करीत आहेत.

मूलचेरा तालुक्यातील नागरिकांमध्ये, “आज भाग्यश्रीताई आमदार असत्या, तर लोकांना इतक्या अडचणींचा सामना करावा लागला नसता,” अशी चर्चाही सुरू असल्याचे सांगितले जात आहे.

मात्र, केवळ खड्डे बुजविण्यापुरती कार्यवाही मर्यादित न राहता रस्त्यांच्या मंजुरीची प्रक्रिया लवकर पूर्ण करून प्रत्यक्ष दर्जेदार रस्त्यांच्या कामाला सुरुवात करावी, अशी नागरिकांची अपेक्षा आहे. पावसाळ्यात पुन्हा रस्त्यांची दुरवस्था होऊ नये, यासाठी कायमस्वरूपी उपाययोजना करण्याची मागणीही होत आहे. प्रशासनाने रस्त्यांच्या कामाला गती देऊन नागरिकांना सुरक्षित आणि सुस्थितीत रस्ते उपलब्ध करून द्यावेत, अशी अपेक्षा मूलचेरा तालुक्यातील नागरिकांकडून व्यक्त होत आ