भेंडाळा–लखमापूर बोरी रस्त्याची चाळण; प्रशासनाच्या दुर्लक्षामुळे नागरिक त्रस्त

खड्डे, चिखल अन् दाट झाडाझुडपांमुळे प्रवास धोकादायक; तातडीने दुरुस्तीची नागरिकांची मागणी

भेंडाळा : तालुक्यातील भेंडाळा–लखमापूर बोरी मार्गाची अक्षरशः चाळण झाली असून, रस्त्याच्या दुरुस्तीकडे प्रशासन आणि लोकप्रतिनिधींचे दुर्लक्ष होत असल्याचा आरोप नागरिकांकडून केला जात आहे. गेल्या अनेक वर्षांपासून रस्त्याची म्हणावी तशी दुरुस्ती न झाल्याने मार्गावर मोठमोठे खड्डे पडले आहेत. पावसामुळे या खड्ड्यांमध्ये पाणी व चिखल साचत असल्याने वाहनचालकांसह पादचाऱ्यांची मोठी गैरसोय होत आहे.

भेंडाळा–लखमापूर बोरी मार्गावर सगणापूर, कान्होली, एकोडी, कळमगाव यांसह अनेक गावांचा संपर्क येतो. या मार्गावर एसटी महामंडळाची बससेवाही सुरू आहे. त्यामुळे दररोज विद्यार्थी, शेतकरी, कामगार, कर्मचारी तसेच परिसरातील नागरिक मोठ्या प्रमाणात या रस्त्याचा वापर करतात. मात्र रस्त्याची दुरवस्था झाल्याने नियमित प्रवास करणाऱ्यांना मोठ्या त्रासाला सामोरे जावे लागत आहे.

कळमगाव परिसरात खड्ड्यांचे साम्राज्य

कळमगावजवळ रस्त्यावर ठिकठिकाणी खोल खड्डे पडले असून, पावसाच्या पाण्यामुळे संपूर्ण रस्ता चिखलमय झाला आहे. खड्ड्यांचा अंदाज न आल्याने वाहनचालकांना वाहने सावधपणे चालवावी लागत आहेत. विशेषतः दुचाकीस्वारांसाठी हा मार्ग धोकादायक बनला असून, किरकोळ अपघातांच्या घटना घडत असल्याचे नागरिक सांगतात.

रस्त्यावर झाडाझुडपांचे अतिक्रमण

रस्त्याच्या दुतर्फा वाढलेली दाट झाडेझुडपे रस्त्यावर आली आहेत. त्यामुळे अनेक ठिकाणी रस्त्याची रुंदी कमी झाली असून समोरून येणाऱ्या वाहनांचा अंदाज घेणे कठीण जात आहे. परिणामी दुचाकी व चारचाकी वाहनधारकांना मोठी कसरत करावी लागत आहे. रात्रीच्या वेळी हा धोका आणखी वाढत असल्याचे नागरिकांचे म्हणणे आहे.

विद्यार्थ्यांसह शेतकऱ्यांचीही गैरसोय

या मार्गावरून शाळा-महाविद्यालयात जाणारे विद्यार्थी, शेतमालाची वाहतूक करणारे शेतकरी तसेच रोजंदारीसाठी प्रवास करणारे कामगार मोठ्या संख्येने ये-जा करतात. मात्र खड्डे आणि चिखलामुळे वेळेचा अपव्यय होत असून वाहनांचे नुकसानही होत आहे. एसटी बससेवाही या खराब रस्त्यावरूनच सुरू असल्याने प्रवाशांना धक्के खात प्रवास करावा लागत आहे.

‘अपघाताची वाट पाहू नका’; तातडीने दुरुस्ती करा

रस्त्याची दुरवस्था दिवसेंदिवस वाढत असताना प्रशासनाने आता केवळ पाहणी न करता प्रत्यक्ष दुरुस्तीचे काम हाती घ्यावे, अशी मागणी नागरिकांकडून होत आहे. रस्त्यावरील खोल खड्डे तातडीने बुजवावेत, रस्त्याच्या कडेला वाढलेली झाडाझुडपे हटवावीत आणि मार्गाची कायमस्वरूपी सुधारणा करावी, अशी मागणी जोर धरत आहे.

मोठा अपघात किंवा जीवितहानी होण्यापूर्वी प्रशासनाने या मार्गाकडे गांभीर्याने लक्ष देऊन तातडीने उपाययोजना कराव्यात, अशी अपेक्षा भेंडाळा–लखमापूर बोरी मार्गावरील गावांतील नागरिकांनी व्यक्त केली आहे.